63

31 декабря 2018 в 19:03

Саҥа дьыл — баҕа санааны толорор бырааһынньык

Саҥа дьылга баҕа санаалар олоххо киирэр үгэстээхтэр. Кырачаан киһи мичээриттэн, Тымныы оҕонньорго итэҕэйэн хараҕын улаханнык көрбүт түгэниттэн ураты ама туох истиҥ иэйии баар буолуоҕай? Оннук алыптаах түгэн үтүө санаалаах дьон баар буолан тосхойор. Ол курдук, Саҥа дьыл бырааһынньыгын саҕана үгүс депутаттар, үрдүк сололоохтор оҕолорго бу курдук үөрүүлээх түгэни бэлэхтиир үгэстээхтэр. Онтукаларын кэпсээн-ипсээн оҥостубаталлар даҕаны, уостан-уоска бэриллэн син биир биллэр.

Депутат оҕолорго Саҥа дьыллааҕы бэлэҕэ

Ил Түмэн депутата, биллэр-көстөр предприниматель уонна меценат Руслан Федотов Саха сирин кырачааннарыгар сылын аайы минньигэс бэлэх аадырыстаан ыытар.
600 Саҥа дьыллааҕы минньигэс бэлэхтэр Амма улууһа – Уус-Маайа оройуона – Хаҥалас улууһа – Чурапчы улууһа – Үөһээ Бүлүү улууһа – Дьокуускай анал маршрутунан айаннаатылар. Ол туһунан СИА иһитиннэрдэ.

 

Коммунистар Мохсоҕоллооххо 10 оҕону көрүүгэ-истиигэ ыллылар

Мохсоҕоллоохтооҕу оҕо дьиэ­тин 10 оҕотун РФКП Саха сиринээҕи салаата бэйэтин көрүү­түгэр-истиитигэр ылла. Ол курдук депутаттар Вячеслав Макаров, Александр Лотов, Хаҥалас улууһун коммунистарын бастакы сэкирэтээрэ Надежда Сысуева буоланнар Мохсоҕоллоохтооҕу оҕо дьиэтигэр сылдьан оҕолору кытары көрүстүлэр, Саҥа дьыллааҕы минньигэс астаах хоруопкалары бэлэхтээтилэр.

 

Александр Сусоев хамаандатын көмөтө

Норуот депутата Александр Сусоев салайыылаах ХИФУ студеннарын идэлээх сойуу­­һун активистара кыһалҕалаах дьоҥҥо, кырдьаҕастарга, элбэх оҕолоохторго мэлдьитин көмө оҥороллор. Ол курдук сылын аайы Ил Түмэн V ыҥырыытын депутата Евгения Михайлова кыттыылаах бэйэлэрин уокуруктарыгар Саҥа дьыл бырааһынньыгын саҕана элбэх оҕолоох ыалларга, сэрии, тыыл ветераннарыгар бэлэх түҥэтэллэр.

 

Виктор Лебедев массыына бэлэхтээтэ

Ил Түмэн депутата Томпо улууһун Охотский Перевоз сэлиэнньэтин оскуолатыгар улахан көмө оҥордо. “Улусмедиа” сайта иһитиннэрбитинэн, норуот депутата Виктор Лебедев Охотский Перевоз оскуолатыгар УАЗ массыына бэлэхтээбит. Оскуола директора Галина Тен: “Оскуолабыт өр сылларга баҕарбыт баҕата туолла – оҕолор оройуон, өрөспүүбүлүкэ таһымнаах күрэхтэһиилэргэ, сынньалаҥҥа сылдьар кыахтаннылар! Биһиги оскуолабытыгар УАЗ массыынаны норуот депутата Виктор Лебедев бэлэхтээтэ. Биһиги кыһалҕабытын ылынан истиҥник сыһыаннаспытыгар киниэхэ улаханнык махтанабыт”, — диэтэ.

Поделиться