53

11 сентября 2017 в 16:30

Александр Жирков: Василий Стрекаловскай аата саха норуотун спортивнай историятыгар киирдэ

Балаҕан ыйын 5 күнүгэр Уус Алдан улууһун олохтоохторо чулуу уолларын, биир дойдулаахтарын, быйыл Турцияҕа Самсун к. ыытыллыбыт XXIII Сурдлимпийскай оонньууларга көҥүл тустууга чемпион үрдүк аатын ылбыт Василий Стрекаловскайы уонна кинини кыайыыга кынаттаабыт уһуйааччыларын, Арассыыйа үтүөлээх тренерэ Василий Стручкову, Саха Өрөспүүбүлүкэтин үтүөлээх тренерэ Ким Колодезниковы көрүстүлэр.

Сурдлимпийскай оонньууларга кыайыылааҕы, тренердэрин өрөспүүбүлүкэ салалтатын аатыттан Саха Өрөспүүбүлүкэтин Ил Түмэнин Бэрэссэдээтэлэ Александр Жирков уонна Саха Өрөспүүбүлүкэтин Идэлээх сойуустарын бэдэрээссийэтин бэрэссэдээтэлэ Николай Дегтярев эҕэрдэлээтилэр.
Ил Түмэн спикерэ Александр Жирков биир дойдулаахтарын Саха сирэ уонна Арассыыйа киэн туттар спортсмена, XXIII Сурдлимпиада чемпиона Василий Янович Стрекаловскай уонна кини тренердэрэ  Василий Стручков, Ким Кимович Колодезников саха норуотугар үрдүк ситиһиини аҕалбыттарынан эҕэрдэлээтэ.
“Бүгүн саха норуота барыта уруйдуур-айхаллыыр улахан үөрүүлээх күнэ. Мөлүйүөнүнэн ахсааннаах нэһилиэнньэлээх государстволар олимпийскай оонньуулар саҕаланыахтарыттан Олимпиада саамай үрдүкү пьедесталыгар тахсыбыт спортсмена суох күн бүгүҥҥэ диэри күрэхтэһэллэр. Оттон Василий Янович сахалар Олимпиадаҕа кыттыыларын историятыгар бэһис чемпион буолла”, – диэн Ил Түмэн спикерэ бэлиэтээтэ – “Бастакы олимпийскай чемпион – Тимир Алексеевич Пинегин (1960, Неаполь), иккиһинэн — Роман Михайлович Дмитриев (1972, Мюнхен), үсүһүнэн — Павел Павлович Пинигин (1976, Монреаль), 2009 сыллаахха XXI Сурдлимпийскай оонньууларга Сергей Александрович Николаевчемпионнаабыта, уонна быйыл сахалартан Роман Дмитриев  олимпийскай чемпион буолбут күнүн 45 сылыгар, Василий Янович Стрекаловскай сурдлимпийскай чемпион буолла”.
Атырдьах ыйын 31 күнүгэр Роман Михайлович Дмитриевка, саха норуотугар олимпийскай мэтээли аҕалбытын 45 сылыгар, Дьокуускай куоракка Николай Николаевич Тарскай аатын сүгэр “Туймаада” стадион иннигэр пааматынньык аһыллыбыта.
Александр Жирков Николай Тарскай 60-с сыллардаахха, аан бастакынан саха норуотугар спорт маассабай көрүҥнэрин тарҕатар кэмигэр, эппит баҕа санаатын ахтан аһарда: “Биһиги, сахалар, күммүт үүнүөҕэ, саха чулууттан-чулуу спортсменнара аан дойду саамай үрдүкү күрэхтэһиилэригэр үрдүк пьедесталларыгар тахсыахтара, сахаттан аан дойду чемпионнара, олимпийскай чемпионнар баар буолуохтара”. Николай Тарскай ити этиитин бастакынан Роман Дмитриев бигэргэппитин бэлиэтээтэ.
“Инникитин даҕаны чулууттан-чулуу спортсменнар, күүстээхтэн-күүстээх, быһыйтан-быһый аан дойду бастыҥнарын кытта тэҥнэһэр тутустахха тутулуктаах, хабыстахха хабылыктаах кус быһыйдар, ат бөҕөлөр, имигэстэр, сымсалар, кыраҕа харахтаах бэргэн ытааччылар тахса турдуннар. Василий Стрекаловскай аата кыһыл көмүс буукубанан суруллан, саха норуотун спортивнай историятыгар киирдэ”, – диэн туран, Александр Жирков Василий Стрекаловскайы Саха Өрөспүүбүлүкэтин физическай култуураҕа уонна спорка ситиһиилэрин иһин Саха Өрөспүүбүлүкэтин Ил Түмэнин Бочуоттаах грамотатынан наҕараадалаата. Итиэннэ олимпийскай резервэ оскуолатын тренерэ Ким Колодезниковка уонна СӨ спорт үрдүкү маастарыстыбатын оскуолатын тренерэ Василий Стручковка Ил Түмэн Бэрэссэдээтэлин Махтал суругун туттартаата.
Улуус баһылыга Алексей Федотов Василий Стрекаловскайга Уус Алдан улууһун социальнай-экономическай сайдыытыгар кылаатын иһин уонна XXIII Сурдлимпийскай оонньууларга үрдүк ситиһиилэммитинэн Уус Алдан улууһун Бочуоттаах олохтооҕун дастабырыанньатын туттарда уонна улуус дьаһалтатын аатыттан 1 мөл. солк. сертификат бэлэхтээтэ. Чемпион уһуйааччыларын Ким Колодезниковы «Уус Алдан улууһун социальнай-экономическай сайдытыыгар кылаатын иһин» бэлиэнэн, Василий Стручкову “Уус Алдан улууһун бочуоттаах олохтооҕо” дастабырыанньанан наҕараадалаата.
XXIII Сурдлимпийскай оонньууларга кыайыылаах, “Хотугу сулус” орден кавалера Василий Стрекаловскай бэйэтин харда тылыгар биир дойдулаахтарыгар, Уус Алдан улууһун олохтоохторугар, кыайыыны ситиспит үөрүүтүн тэҥҥэ үллэстэн, биир сомоҕо буолан көрсүбүттэригэр улахан махталын биллэрдэ.

Ил Түмэн
пресс-сулууспата