11

02 ноября 2018 в 15:16

Уу суолунан Дьокуускайга 1000 тонна кэриҥэ балык тиэрдилиннэ

Соторутааҕыта СӨ тыа хаһаайысты­батыгар миниистирин солбуйааччы Василий Афанасьев уонна “Туймаада-Агроснаб” ААУо генеральнай директора Павел Чириков “Туймаада-Агроснаб” «Магдебург» уонна «Мальчиков» рефрижератор-теплоходтарын көрүстүлэр. Уу ааллара хотугу уонна Арктика оройуоннарыттан балыгы тиэйэн аҕаллылар. “Туймаада-Агроснаб” ном­нуо 18-с сылын хоту­гу улуустартан балыгы тиэйиинэн дьарыктанар.

Иккис тиэйии түмүк­тэринэн Саха сирин 7 оройуонуттан – Орто Халыматтан, Аллараа Халыматтан, Абыйтан, Аллайыахаттан, Эдьигээнтэн, Усуйаа­наттан уонна Булуҥтан ба­лыгы тиэйии кээмэйэ 400 тонна буолла.
Василий Афанасьев бэ­лиэтээбитинэн, быйылгы навигация кэмигэр Арктикаттан уонна хотугу оройуоннартан 1000 тонна кэриҥэ балык аҕалыллыбыт. Балык ааспыт сыллааҕар элбэхтик бултанна. Ол курдук, ааспыт сылга хаһаайыстыбалар 800 тоннаҕа чугаһыыр “көмүс хатырыктааҕы” ылбыттара.
«Магдебург» суудуна капитана Василий Лебедев кинилэр номнуо 27 сыл тухары Дьокуускайга балыгы тиэйиигэ уонна хотугу оройуоннар олохтоохторун аһынан-үөлүнэн, табаарынан хааччыйыыга Арктика усулуобуйаларыгар уустук, ол эрээри суолталаах соругу толороллорун кэпсээтэ.
«Арктикаҕа кубулҕаттаах күн-дьыл турарын үрдүнэн, биһиги суудуна экипажтарын түмсүүлээх үлэлэрин түмүгэр хас сыл аайы тиэйии былаанын толоробут, — диир Василий Лебедев. – Быйыл табыгастаах күн-дьыл туран биэрдэ – улахан тоҥоруу суоҕа, ол эрээри иккис рейспит кэмигэр күүстээх тыал түспүтэ. Онтон сылтаан расписаниебыт уларыйбыта. 20-тэн тахса күн харахпын симпэккэ да кэриэтэ сырыттым, суолтан кыратык да халыйдахпытына, кэмигэр ситиһэр кыахпыт суох буоларын өйдүүбүн… Ааспыт сылга би­һиги навигацияны алтынньы 16 к. түмүк­тээбиппит, оттон быйыл – алтынньы 19 күнүгэр».
Чахчы да, суудуналар олус уустук услуобуйаҕа рейскэ туруналлар, хотугу тиэйии бэйэтэ да оннук. Онон капитан уонна “Магдебург” теплоход экипаһын хорсун дьайыыларын түмүгэр навигация ситиһиилээхтик ааста.
Өрөспүүбүлүкэ киин куора­тыгар рефрижератордарынан сүнньүнэн чыыр, уомул, муксуун, тууччах аҕалылыннылар. Бастаан сүө­кээһин барар, ол кэнниттэн астыыр тэрилтэлэринэн тарҕатыллар. Онон Арктика дьыалаларыгар Судаарыстыбаннай кэмитиэт дьарыктанар. Ол кэнниттэн номнуо астаммыт бородууксуйаны – минньигэс балыгы өрөспүүбүлүкэ олохтоохторо сыл устатыгар ас-үөл маҕаһыыннарыгар атыылаһыахтара.

СӨ тыа хаһаайыстыбатыгар министиэристибэтин пресс-сулууспатын матырыйаалынан.