11

09 ноября 2018 в 10:36

Тиксиигэ тыйыс усулуобуйаны тулуйар тыал паарката арылынна

Сэтинньи 7 күнүгэр Булуҥ улууһун Тиксии бөһүөлэгэр 300 кВт кыамталаах тыал пааркатын үөрүүлээх арыллыыта буолла.

Санатар буоллахха, быйыл Булуҥҥа тас дойду инвестордара кыттыылаах бөдөҥ бырайыак үлэтин саҕалаабыта. Тыал күүһүнэн эниэргийэни хачайдыыр ыстаансыйаны өрөспүүбүлүкэ бырабыыталыстыбата «РусГидро» уонна дьоппуон Komaihaltec Inc хампаанньатын кытта энергетическэй уонна бырамыысыланнай технологияны сайыннарыы чэрчитинэн олоххо киллэрдилэр.
От ыйын бүтүүтэ 200 тонна кэриҥэ ыйааһыннаах оборуудабанньа суолунан, уунан ыраах Арктика эҥээр сытар Тиксии бөһүөлэгэр тиийбитэ. Бу Арассыыйаҕа ураты быра­йыак буолар. 900 кВт кыамталаах тыал көмөтүнэн үлэлиир үс тэрили, уопсайа 3 МВт кыамталаах уматыгынан барар генераторы уонна уот энергиятын мунньар аккумулятор систиэмэни, автомат көмөтүнэн үлэлиир биир кэлим технологическай комплекска холбоон үлэлэттилэр.
Хас биирдии тыал көмөтүнэн үлэлиир ыстаансыйа 300 кВт кыамталаах, башня үрдүгэ – 41,5 м, лопаһын диаметра – 33 м.
Тыал пааркатын үөрүүлээх арыллыытыгар Ил Дархан Айсен Николаев, СӨ Бырабыыталыстыбатын бэрэссэдээтэлин бастакы солбуйааччы Алексей Колодезников, Хабаровскай куоракка баар Япония генеральнай консула Масанори Фукусима, «РусГидро» генеральнай дириэктэрэ Николай Шульгинов, NEDO дьоппуон хампаанньатын толорооччу дириэктэрэ Такаси Омотэ,  «Комаихалтек» вице-бэрэсидьиэнэ Эми Комаи уонна «Якутскэнерго» генеральнай дириэктэрэ Александр Слоик видео кэмпириэнсийэ нөҥүө быһаччы кытыннылар.
Төһө да кылгас кэм иһигэр тыал паарката тутулуннар, хаачыстыбатын мэктиэлиибит диэн тутааччы хампаанньа иһитиннэрдэ. Ол курдук, күрүс тыалы, тайфуну, оннооҕор сир хамсааһынын тулуйар гына, итиэннэ уот-күөс хамсааһынын, тымныыга салбахтара мууһурарын, ардах-силбик дьайыытын барытын учуоттаан, бөҕө-таҕа гына оҥоһуллубут.
«Манна маарынныыр Европа уонна Америка технологиятынан хас да тыал электростанциятын тута сатаабыппыт да, табыллыбатаҕа. Бу сырыыга дьоппуон инженердэрин уонна «РусГидро» хампаанньа баай уопутун туттан, биһиги усулуобуйабытыгар чахчы эппиэттиир ханна да суох сүдү тутуу олоххо киирдэ», — диэн Ил Дархан Айсен Николаев эттэ.
Дьэ, чахчы хотугу эргимтэҕэ аан дойдуга саамай тыйыс усулуобуйаҕа олорор дьон олоҕун тупсарыыга дьоһун хардыы оҥоһулунна.