9

09 ноября 2018 в 10:09

Саха театра Англияҕа гастроллуур былааннаах

П.Ойуунускай аатынан Саха академическай театра Шекспир төрөөбүт дойдутугар гастроллары тэрийэр былааннаах. Ити туһунан пресс-конференцияҕа театр директора Анатолий Николаев иһитиннэрдэ.

Гастроллар туурдарын тэрийэр сатан­наҕына, туманнаах Альбион көрөөччүлэригэр анаан Саха театра У.Шекспир айымньыларынан тута үс туруорууну оонньуоҕа.
«Биһиэхэ Шекспиргэ үс үчүгэй испэктээктээхпит. Сергей Потапов “Тиит” уонна “Мой друг Гамлет” испэктээктэрэ уонна Андрей Борисов “Илиир хоруол” туруоруута. Барыта табылыннаҕына, театр Англияҕа барыан уонна онно Глобус театр сыанатыгар Шеспир үс испэктээҕин көрдөрүөн сөп», — диэн бэлиэтээтэ Анатолий Николаев.
Театр тутаах сонуннарыттан биирдэстэринэн 2019 сылга Щепкин аатынан театральнай училище иһинэн алтыс студияны аһыы буолуоҕа, онно Саха сириттэн устудьуоннар үөрэниэхтэрэ. Саха театра аатырбыт «Щепканы» кытта үлэлээһинэ номнуо үгэскэ кубулуйда. Театр үгүс артыыстара чуолаан онно үөрэммиттэрэ. Бүгүҥҥү күҥҥэ илии баттанар сөбүлэһии быһыытынан, 2019 сыл от ыйын бүтүүтэ, атырдьах ыйын саҥатыгар Дьокуускайга тутар хамыыһыйа кэлэн үлэлиэхтээх. 11 кылаас оҕолоро БКЭ көрүҥүнэн туттарар киирии экзаменнарын, предметтэрин туһунан сиһилии иһитиннэрии тохсунньуга тахсыаҕа. Барыта 20 миэстэ ананыаҕа: 15 бюджеттан уонна 5 – контракт төрүтүгэр. Курсу бүтэрбиттэр бары Саха сирин театрдарыгар, сүнньүнэн Саха театрыгар үлэҕэ киириэхтэрэ.

Наталия Чемашкина,
СИА.