182

11 ноября 2016 10:57

Саха сирин бюджетын дьүүллэһии

Судаарыстыбаннай Мунньах (Ил Түмэн) Бэрэссэдээтэлэ Александр Жирков сэтинньи 3 к. илии баттаабыт 115 №-дээх дьаһалынан 2016 сыл сэтинньи 15 күнүгэр «2017 сылга уонна 2018-2019 сс. былааннаммыт кэмҥэ Саха Өрөспүүбүлүкэтин судаарыстыбаннай бюджетын туһунан» Саха Өрөспүүбүлүкэтин сокуонун барылын туһунан» темаҕа аһаҕас истиилэр ыытыллыахтара диэн Ил Түмэн пресс-сулууспата иһитиннэрэр.

Аһаҕас истиилэр Ил Түмэн бюджекка, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэтин киэҥ ыҥырыылаах мунньаҕын быһыытынан тэриллиэхтэрэ.
Мунньахха өрөспүүбүлүкэ Бырабыыталыстыбатын бэрэссэдээтэлин бастакы солбуйааччы – экономика миниистирэ Алексей Стручков итиэннэ үп миниистирэ Валерий Жондоров иһитиннэриилэрэ былааннанна.
Ону тэҥэ тэрээһиҥҥэ өрөспүүбүлүкэ парламенын салайааччылара, Саха сирин норуотун депутаттара, бырабыыталыстыба чилиэннэрэ, өрөспүүбүлүкэ министиэристибэлэрин уонна биэдэмистибэлэрин эппиэттээх үлэһиттэрэ, муниципальнай оройуоннар уонна куорат уокуруктарын, сонуну тарҕатар ситимнэр бэрэстэбиитэллэрэ, өрөспүүбүлүкэ уопсастыбаннаһа кыттыахтара.
Юрий Николаев бэрэссэдээтэллээх бюджекка, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэт бу аһаҕас истиилэри Саха Өрөспүүбүлүкэтин сүрүн финансовай докумуонун кээмэйдэрин туһунан өрөспүүбүлүкэ олохтоохторугар иһитиннэрэр сыалтан ыытар.
Аһаҕас истиилэр 2016 с. сэтинньи 15 күнүгэр Саха сирин парламенын дьиэтигэр 330 №-дээх мунньахтыыр саалаҕа буолуох­тара.