Просмотров - 22

18 августа 2017 15:02

Саха сирэ — иккис миэстэҕэ

Российскай Федерация Бырабыыталыс­тыбатын бэрэссэдээтэлин солбуйааччы, Уһук Илиҥҥи федеральнай уокурукка президент боломуочуйалаах бэрэстэбиитэлэ Юрий Трутнев Дьокуускай куоракка «уһук илиҥҥи гектар туһунан» сокуон олоххо киириитин боппуруостарыгар мунньах ыытта. Мунньахха РФ Уһук Илин сайдыытыгар миниистирин солбуйааччы Сергей Качаев, СӨ Ил Дархана Егор Борисов, сир учаастактарын биэриигэ эппиэтинэстээх боломуочуйалаах уорганнар бэрэстэбиитэллэрэ кытыннылар.

«Эһиги бары сокуон бэлэмнэнэр кэмигэр Саха сиригэр тустаах сокуон ылыллыытын өйүүр эбэтэр утарар туһунан саамай актыыбынай дьүүллэһии барбытын өйдүүргүт буолуо. Бүгүн өрөспүүбүлүкэ гектар сири ылыыга сайаапка түһэрбит гражданнарын ахсаанынан бочуоттаах иккис миэстэҕэ сылдьар. Саха сирэ сайабылыанньатын ахсаанынан иккис миэстэҕэ турара тустаах сокуон дьоҥҥо наадатын туһунан этэр», — диэн бэлиэтээтэ Юрий Трутнев.
Вице-премьер: «Уһук Илиҥҥэ сайаапка ахсаана сүүс тыһыынчаҕа чугаһаан эрэр. Бу аҕыйах буолбатах. Сүүс тыһыынча киһи «босхо гектары» ылан туһаныан баҕарар», — диэтэ.
«Саха сирэ ити сыыппараттан 18,5% ылар. Ити аата 18355 учаастак. Бу эмиэ олус үчүгэй көрдөрүү. Саха сирэ тыйыс климаттаах. Биһиги манна кыһына төһөлөөх тымныы буоларын билэбит. Ол да буоллар, Саха сиригэр үлэлиэн-хамсыан, олохсуйуон баҕалаах дьон бааллар, учаастак ылаллар, ол эрээри учаастагы туһаҕа киллэрэр туһугар элбэх үлэ ыытыллыахтаах», — диэн чуолкайдаата Юрий Трутнев.
Санатар эбит буоллахха, Россия хайа баҕарар олохтооҕо Уһук Илиҥҥэ сир учаастагын ылан биэс сыл устата босхо туһаныан сөп. Ити бырааптарын туһанан номнуо 99,5 тыһ. киһи сайаапка түһэрбит. 27 тыһ. кэриҥэ учаастак хайыы-үйэ туһаныыга бэриллибит. Оттон Саха сиригэр 18,3 тыһ. сайабылыанньа киирбититтэн, 4,4 тыһ. учаастак туһаныыга бэриллибит.

Dog