13

05 октября 2018 в 11:45

Пассажирдарга вагоннар бэлэмнэнэллэр

 

 

Балаҕан ыйыгар «Саха сирин тимир суоллара» АХ пассажирдары тиэйиигэ усулуобуйалары тупсарар сыалтан, үс плацкартнай дэнэр дьону тиэйэр вагоннары саҥардыыны саҕалаата. Вагоннарга-пассажирдарга сулууспа начальнига Алексей Соколов иһитиннэрбитинэн, хампаанньа бэрэстэбиитэлэ номнуо вагоннары арыаллаан Гомеллааҕы вагоннары өрөмүөннүүр собуокка барбыт. Онно хапытаалынай өрөмүөн ыытыллыахтаах, ол курдук вагон ис тэриллэрэ, электрическэй ситимэ, түннүктэрэ, ис быыстара, муостата бүтүннүү уларыйыахтаахтар.

Кини салгыы бэлиэтээбитинэн, сэтинньи бүтүөр диэри “Саха сирин тимир суоллара” АХ Тверьдээҕи вагону тутар собуоттан саҥа моделлаах биир плацкартнай вагону атыылаһар былааннаах. Вагоҥҥа салгылатар система, биотуалеттар баар буолуохтара, ис оҥоһуута саҥардыллыбыт. Томмот – Аллараа Бэстээх тимир суол учаастага түмүктэниитинэн, кинини бастайааннай үлэҕэ киллэриинэн итиэннэ Аллараа Бэстээх станциятыттан пассажирдары тиэйии былааннанарынан сибээстээн, хампаанньа бэйэтин пааркатын саҥардар уонна толорор.
Санатан эттэххэ, бүгүҥҥү күҥҥэ Томмоттон уонна Алдантан поеһынан Россия ханнык баҕарар муннугар тиийиэххэ сөп. Күннэтэ Томмот – Нерюнгри поеһа айаҥҥа турунар, онон вагоннар Тындаҕа. Благовещенскайга, Хабаровскайга уонна Москваҕа диэри ыытыллаллар. Оттон 2012 сылтан саамай дьон элбэхтик айанныыр Томмот – Благовещенскай маршрутунан көспөккө эрэ плацкартнай вагонунан туһааннаах сиргэ тиийиэххин сөп. 2015 сыл бэс ыйын 1 күнүттэн бу хайысхаҕа купелаах вагон ыытыллар буолбута.

«Саха сирин тимир суоллара»
АХ» АУо пресс-сулууспатын
матырыйаалынан.