51

07 августа 2017 в 11:35

Үлэ тэтимэ түргэтиир

Тыа хаһаайыстыбатын уонна ас-үөл бэлиитикэтин минис­тиэристибэтин пресс-сулууспата иһитиннэрэринэн, өрөспүүбүлүкэ үрдүнэн 118 тыһ. га сир охсуллубут. Атырдьах ыйын 1 күннээҕи дааннайынан 82 707 тн от хомуллубут. Былырыыҥҥы сылы кытта тэҥнээтэххэ, оту бэлэмнээһиҥҥэ былаан туолуута инникилээн иһэр. Санатар буоллахха, быйылгы сылга 487 972 тн от оттоноро, 18 900 тн сиилэс, 11 900 тн сенаж бэлэмнэнэрэ былааннаммыт.

Сүөһү аһын бэлэмнээһиҥҥэ уопсайа 10 тыһ. тыраахтар, 9 тыһ. звено үлэлии сылдьар. 34 тыһ. киһи от үлэтинэн хабыллыбыт.
От оттооһунугар ханнык улуустар инники күөҥҥэ тахсыбыттарый? 10 тыһ. тн от Мэҥэ-Хаҥалас улууһугар, 5 тыһ. тн от Кэбээйи улууһугар оттоммуттар. Ол курдук, былааннарын 30% Бүлүү, Уус-Алдан, Уус-Майа, Хаҥалас улуустара толорбуттар.
Үөһээ Дьааҥыга оттуур кэм кылгас уонна халлаан туран биэрэрэ кэмнээх буолан, улуус баһылыга Виктор Павлов бүддьүөт тэрилтэлэригэр, үлэһиттэригэр хамнастарын төлөөн туран, от үлэтигэр кыттыһыннаралларын туһунан дьаһал таһаарбыт. Ол дьаһал түмүгэр 1596 киһи окко тахсыбыт, билиҥҥитэ 1823 тн оттоммут. Былырыын Үөһээ Дьааҥыга атырдьах ыйын саҥатыгар баара-суоҕа 600 тн от оттоммута.
Ол да буоллар, хотугу улуустарга от бэлэмнээһин үлэтэ мөлтөхтүк барар. Холобур, Абыйга 80 тн., Булуҥҥа 24 тн., Өймөкөөҥҥө 55 тн эрэ от оттоммут. Халлаан туруга халбаҥын учуоттаан, өрөспүүбүлүкэ тыа хаһаайыстыбатын уонна ас-үөл бэлиитикэтигэр министиэристибэтэ бэс ыйыгар “Туймаада-Нефть” ААО-ҕа балаҕан ыйыгар диэри тыа хаһаайыстыбатын бородууксуйатын оҥорон таһаарар тэрилтэлэригэр убаҕас уматыгы иэс биэрэн эрэллэригэр этиилээх тахсыбыт. Маныаха тыа хаһаайыстыбатын тэрил­тэлэригэр 141 убаҕас уматык ыытыллыбыт.
Оттон тонна от сыаната өрөспүүбүлүкэҕэ төһөнөн быһыллыбыт эбитий? Киин улуустарга1 кылаастаах тонна от сыаната 5000 солк., 2 кылаастаах от 4100 солк., 3 кылаастаах от 3400 солк. элбэҕэ суох буолуохтаах. Хотугу уонна арктическай улуустарга 1 кылаастаах тонна от сыаната 7000 тыһ. солк., 2 кылаастаах – 6000 тыһ. солк, 3 кылаастаах – 5000 тыһ. солкуобайынан быһыллыбыт.