60

11 сентября 2017 в 16:04

Көмүс күһүн саҥа ирдэбиллэри киллэрдэ

Балаҕан ыйыттан саҥа сокуоннар үлэлээтилэр. Арассыыйа гражданина буолааччы бирисээгэ биэрэр сиэри толоруоҕа. Массыына саахалыгар түбэспит ночоотун харчынан ылара күчүмэҕэйдэммит. Оттон сөмөлүөтүнэн көтөөччүлэр илиилэригэр тутан киирэр таһаҕастарын кытта кэккэ наадалаах тэриллэри киллэрэллэрэ бобуллубут. Саҥа сокуоннар тустарынан манна ааҕыҥ.

Арассыыйаҕа бэриниини туоһулуур бирисээгэ

Арассыыйанын буолар дьон бирисээгэ биэрэр буоллулар. Бу сиэри толорууну ылынар туһунан Президент Владимир Путин этии киллэрбит. Госдума кэмитиэтин бэрэссэдээтэлэ Павел Крашенников иһитиннэрбитинэн, аллараа палаатаҕа бирисээгэ 90-ча тиэксин барыйаана киирбит. Онтон биир тиэкиһи талан, бирисээгэ тиэкиһинэн бигэргэппиттэр. Тиэкис ис хоһооно: “Я. Ф.И.О., добровольно и сосознанно принимаю гражданство РФ, клянусь соблюдать Конституцию и законодательство РФ, права и свободы ее граждан, исполнять обязанности гражданина РФ на благо государства и общества, защищать свободу и независимость РФ, быть верным России, уважать ее культуру, историю и традиции”.
Бирисээгэни биэрии сиэриттэн сокуоннай саастарын туола илик оҕолору уонна мөлтөх доруобуйаларынан сатаан саҥарбат эбэтэр илии баттаабат дьону эрэ босхолуохтара. Бу категорияҕа хапсыбат дьон бирисээгэ этэллэриттэн аккаастанар буоллахтарына, РФ гражданствота бэриллибэт.
Маны таһынан РФ холуобунай-процессуальнай кодексыгар уларытыы кииирдэ. Ол курдук, буруйдуур бириигэбэр куоппуйатын РФ гражданствотын салайар биэдэмэстибэҕэ ыытар буолуохтара. Оччоҕо терроризмҥа уонна экстремизмҥа буруйдаммыт омук дьоно РФ гражданствотыттан быһыллыахтара.
Терапевтар уонна оҕо быраастара интернатураттан босхолонуохтара
Быйыл терапевт уонна оҕо бырааһа буоларга бэлэмнэнэр быраастар интернатураны ааспат буолуохтара. 2016 сыллаахха бу үөрэх көрүҥүттэн стоматологтары уонна фармацевтары босхолообуттара. Ол курдук, интернатураттан 2013 сыллаахтан бэттэх үөрэххэ киирээччилэри босхолууллар. Оччотугар быраастыылларыгар медицинскэй үрдүк үөрэҕи бүтэрээччилэртэн диплом эрэ ирдэнэр.

Балык бородууксуйатын хонтуруолга

Балык бородууксуйатын хаачыстыбатын Евразийскай экономическай сойуус техническэй регламенынан сыаналыыр буолуохтара. Балаҕан ыйыгар бу үлэни ханнык федеральнай уонна региональнай уорганнар салайаллара быһаарыллыаҕа. Маны таһынан судаарыстыбаннай хонтуруол оҥорон таһаарыыны, харайыыны, таһыыны хонтуруоллуоҕа. Ол боломуочуйалар Роспотребнадзорга, Россельхознадзорга, кинилэр регионнааҕы салаалалыргар сүктэриллиэҕэ.

Хампаанньалары Юридическай сирэйдэр реестдарыттан (ЕРГЮЛ) таһаарыы

Балаҕан ыйын 1 күнүттэн хампаанньалары Юридическай сирэйдэр биир кэлим реестрдарыттан таһаарарга төрүөттэр испииһэктэрэ кэҥээтэ. Холобур, үбэ суох буолан сатаан сабыллыбакка сылдьар юридическай сирэйи биир кэлим реестырыттан таһаараллар. Маны таһынан хааччахтаммыт эппиэтинэстээх уопсастыба сабыллар болдьоҕо биир сылтан уһун буолуо суохтаах. Өскөтүн тэрилтэни сабыы бырассыаһа биир сыл иһигэр түмүктэммэтэҕинэ, суутунан салҕаныан сөп. Ол гынан баран, 6 ыйтан тахсыбакка.

ОСАГО-нан хорумньуну быһаччы толуйуу

Саҥа сокуонунан үс уонна онтон элбэх массыына аварияҕа кыттыбыт эрэ буоллаҕына, түбэспит киһи страховкаламмыт хампаанньатыгар тыраанспарын өрөмүөннэтэригэр эбэтэр харчынан төлөбүр ыларыгар этиилээх тахсыахтаах. Урут икки массыына саахалга кыттыспыт буоллаҕына, бу быраабынан туһаныахтарын сөбө.
ОСАГО-нан төлөбүр систиэмэтин уларытар саҥа быраабылалар быйыл муус устарга олоххо киирбиттэрэ. Ол курдук, харчынан төлөбүр оннугар массыынаны өрөмүөннэтэр инники күөҥҥэ тутуллубута. Маны таһынан саҥа докумуон өрөмүөнү оҥорууга ирдэбиллэри бигэргэппит. Өрөмүөн 30 күн иһигэр оҥоһуллуохтаах. Тутуллубут саппаас чаастары туһанар көҥүллэммэт.
Оттон харчынан страховой төлөбүрдэр чопчу ыйыллыбыт эрэ пуунунан төлөнүөхтэрэ. Ол иһигэр массыына оҥоһуллубаттыы алдьаммыт, эмсэҕэлээбит киһи өлбүт, ыарахан эчэйиини ылбыт эбэтэр төрүкү инбэлиит буоллаҕына. Федерация Сэбиэтин бэрэссэдээтэлэ Валентина Матвиенко докумуон Госдумаҕа иккис ааҕыыга бэлэмнэнэригэр регионнартан киирбит 27 көннөрүүлэр учуоттаммыттарын бэлиэтээбитэ.

Баһаары утары эрэсиим кытаатар

Сайыҥҥы сынньалаҥ кэмигэр биир эрэ эвакуацияланан тахсар сирдээх этээскэ уонна мас дьиэлэр мансаардаларыгар оҕололору олохтуур бобулунна.
Үлэни биэрээччи уонтан элбэх оробуочай миэстэлээх уонна этээскэ биир кэм 50 киһи үлэлиир кыахтаах тэрилтэлээх буоллаҕына, эвакуациялыыр былаанынан хааччыйыахтаах. Түүннэри үлэлиир эбийиэктэргэ баһаар буолар түгэнигэр инструкциянан, төлөппүөнүнэн, банаардарынан, тыынары көмүскүүр тэриллэринэн салайааччы хааччыйыахтаах.
Уопсай туһанар сирдэргэ кутаа уотун оттор уонна бөх уматар көҥүллэммэт. Олохтоох бэйэни салайыныы уорганнара маныаха чопчу сир аныахтаахтар.
Төннөрүллүбэт билиэттэн таһаҕас сыанатын ылыахтара
Авиакомпаниялар төннөрү­ллүбэт билиэти атыылыылларыгар босхо таһаҕас нуорматын суох оҥорор быраап­таннылар. РФ бырабыытылыстыбата бу сокуону көҕүлүүрүгэр билиэт сыаната чэпчиэн сөбүгэр туһаайбыта. Ол гынан баран, сенатордар сокуон барылын ырытыһалларыгар илии тутуура уонна босхо таһаҕас диэн категориянан араарыы ыйыллыбатаҕыгар болҕомтолорун уурбуттар. Оччотугар авиакомпаниялар илии тутуурун эмиэ таһаҕас нуорматыгар киллэрэн, сөмөлүөтүнэн көтөөччүнү таһаҕаһын барытын иһин төлүүрүгэр күһэйиэхтэрин сөп. Сэрэйбит сэрэх. Нормативнай-быраап аакталара тахсар порталыгар илии таһаҕаһыгар зонтигы, тас таҥаһы, фотоаппараты, мобильнай телефону, сибэккини киллэрэр бобулларын туһунан докумуон тахсыбыт. Бу докумуон сенатордарга үгүс боппуруостары үөскэппит. Палаата спикера Валентина Матвиенко РФ тыраанспарын министиэристибэтигэр Федерация Сэбиэтин чилиэннэрин кытар докумуону, итэҕэстэрин-быһаҕастарын учуоттаан туран, ситэри оҥороллоругар этии киллэрбит.

«Парламентская газета» хаһыаттан.