Просмотров - 20

31 июля 2017 11:14

Искусственнай ардах ойуур баһаарын умулларар

От ыйын 26 к. туругунан Саха Өрөспүүбүлүкэтэ саамай уот барар регионнартан биирдэстэрэ буолар.

Ол курдук, өрөспүүбүлүкэҕэ 35031 га иэннээх сиргэ 11 ойуур баһаара буола турар. Баһаары умулларыыга барыта 500-чэ киһи тардыллыбыт, ол иһигэр Федеральнай Ойуур харыстабылын авиациятын 201 парашютист-десантнига. Регионнааҕы уонна федеральнай күүстэр кыттыгас үлэлэрин түмүгэр от ыйын устатыгар Нам, Горнай, Уус-Алдан уонна Кэбээйи оройуоннарын нэһилиэнньэлээх пууннарын диэки ойуур баһаара тэнийиитэ тохтотулунна.
Саха сиригэр туһааннаах температуралаах былыттаах күннэр турбуттарынан, ардаҕы искусственнайдык аҕаларга сөптөөх буолбутунан, Федеральнай ойуур харыстабылын авиациятын исписэлиистэрэ сөҥүүнү түһэрэр үлэни ыыталлар.


Ити үлэлэри ыытыыга ПВ-26М пироботуруоннары илдьэ сылдьар, ыйаныллар “Веер” оборудованиелаах анал Ан-26 сөмөлүөт арендаҕа ылыллыбыт. Пироботуруоннарга йодистай үрүҥ көмүс баар. Реагент тоҥмут былыт үөһэ өттүгэр дьайыытынан сөҥүү үөскүүр. Пироботуруоннарынан ытыыны салайар пульт сөмөлүөт салонугар баар.
Ойуур баһаардарын уонна күн-дьыл туругун туһунан дааннайдарга олоҕуран сөмөлүөт көтөр маршрута оҥоһуллар.
Бу үлэлэр от ыйын 24 күнүттэн ыытыллаллар. Бастакы көтүү түмүгэр былыкка дьайыы кэнниттэн 40 мүнүүтэ буолан баран, Горнай оройуонугар бөдөҥ ойуур баһаара буола турар сиригэр ардах курулаччы түстэ. Ардах күүһэ билгэлэммити 14 төгүл куоһарда итиэннэ 28 мм тэҥнэстэ.
Былыкка йодистай үрүҥ көмүһү ыһыы 5 тыһыынча миэтэрэ үрдүктэн оҥоһулунна. Ахсаанынан уонна кэминэн көрөн араас сериялаах 69 пироботуруон ытылынна.
Аны Бүлүү оройуонугар искусственнай ардаҕы тардыыга үлэлэр ыытыллаллар.
«Ойуур баһаарын умулларыы – бу кэлимсэ дьаһаллар, онон ардаҕы искусственнайдык тардыы ол иһигэр киирсэр. Салгынтан көмө – бу сиргэ ойуур баһаарын умулларар дьоҥҥо тугунан да сыаналаммат өйөбүл, онно минерализованнай балаһаны оҥоруу эбэтэр быһаччы умуруоруу хааччыллар», — диэн бэлиэтиир «Авиалесоохрана» ФБУ начальнига Виталий Акбердин.


От ыйын 5-13 күннэригэр “Авиалесоохрана” исписэлиистэрэ Илиҥҥи Сибииргэ уот элбэхтик тахсар сирдэригэр – Иркутскай уобаласка, Забайкальскай кыраайга уонна Бурятия Өрөспүүбүлүкэтигэр искусственнай ардаҕы түһэриигэ үлэлэри ыыттылар. Күүстээх ардахтар уонна орто тэтимнээх ардахтар ойуур фондатын сирдэригэр да, айылҕа ураты харыстанар сирдэригэр да бөдөҥ баһаардары умулларыыга көмөлөстүлэр. Искусственнай ардаҕы түһэрэннэр, Забайкальскай кыраай Тупик сэлиэнньэтин таһыгар баһаар буолар куттала улаханнык намтаата.