54

27 июля 2018 в 11:57

Хаҥаласка боруобалааһын биэрэпис ыытыллар буолла

Саҥа билгэлээһин быһыы­тынан, 2036 сылга тиийэн Россия нэһилиэнньэтэ 157 мөлүйүөн киһиэхэ диэри улаатыан сөп. 2020 сылга буолуохтаах Бүтүн Россиятааҕы нэһилиэнньэ биэрэпиһэ демографияҕа туох уларыйыы тахсарын сыаналыырга көмөлөһүөҕэ. Ол иннинэ быйыл алтынньыга нэһилиэнньэ биэрэпиһин боруобалаан ыытыы былааннаммыта.

 

Росстат 2036 сылга диэри Россия нэһилиэнньэтин саҥалыы билгэлээһини бэлэмнээтэ. Оптимистыы сценарийынан ити кэмҥэ дойду нэһилиэнньэтэ 157 мөл. киһиэхэ диэри улаатыахтаах. Оттон бу иннинэ, 2017 сыл ахсынньытыгар таһаарыллыбыт билгэлээһининэн, 2036 сылга Россия нэһилиэнньэтин ахсаана 154 мөл. киһиэхэ тиийиэхтээх дэммитэ.
2017 сыл бүтэһигэр ылыллыбыт “Доруобуйа харыстабылын сайдыыта” судаарыстыбаннай бырагырааманы учуоттаан билгэлээһин саҥардылынна. Бырагыраамаҕа киһи үйэтэ уһуура уонна өлүү ахсаана намтыыра көрүллэр. Россия Президенэ Владимир Путин ыам ыйынааҕы ыйаахтарыгар нэһилиэнньэ туруктаах үүнүүтүн ситиһэр соругу туруорбута.

 

Ыспыраапка

РФ Бырабыыталыстыбатын 2018 с. тохсунньу 22 к. 58-р №-дээх дьаһалыгар сөп түбэһиннэрэн, 2018 сыллааҕы боруобалааһын биэрэпис Кабардино-Балкарскай Өрөспүүбүлүкэ Эльбрусстааҕы муниципальнай оройуонугар, Саха Өрөспүүбүлүкэтин Хаҥалас улууһугар, Камчатка кыраайын Алеутскай муниципальнай оройуонугар, Красноярскай кыраай Минусинскай куоратыгар, Иркутскай уобалас Нижнеудинскай уонна Катангскай муниципальнай оройуоннарыгар, Великий Новгород куорат уокуругар, Сахалин уобалаһын Южно-Курильскай бөһүөлэгэр, Москва к. Свиблово СВАО оройуонугар уонна Санкт-Петербург к. Княжево муниципальнай уокуругар ыытыллар.

 

Билгэлээһин орто барыйаанынан, 2036 сылга Россия нэһилиэнньэтэ 145,9 мөл. киһи буолуохтаах. Ити иннинээҕи билгэлээһин орто барыйааныгар 147 мөл. киһинэн сабаҕаламмыта. Оттон саҥардыллыбыт пессимистии сценарийынан 2036 сылга дойду нэһилиэнньэтин ахсаана 136,7 мөл. киһиэхэ диэри аҕыйыахтаах.
Бүтүн Россиятааҕы нэһилиэнньэ бүтэһик биэрэпиһин дааннайдарынан, 2010 сылга дойдуга 142,9 мөл. киһи олороро. Оттон Россия састаабыгар киирбит Крым федеральнай уокуругар 2014 с. ыытыллыбыт биэрэпис дааннайдарынан, 2,3 мөл. киһи олороро.
2020 сылга саҥа Бүтүн Россиятааҕы нэһилиэнньэ биэрэпиһэ ыытыллыаҕа. Онно 10 сыл иһигэр демографияҕа туох уларыйыы буолбута көстүөҕэ.
Быйыл алтынньы 1-31 күннэригэр нэһилиэнньэ биэрэпиһэ боруобалаан ыытыллар. Бу иннинээҕи итинник тэрээһиннэртэн төрдүттэн уратылаах – дааннайдары хомуйууга аан бастаан саҥа иһитиннэрэр технологиялар киэҥник туһаныллыахтара.
Боруобалааһын биэрэпис бастакы түһүмэҕэр – алтынньы 1-10 күннэригэр – Gosuslugi.ru порталга киирэр Россия ханнык баҕарар олохтооҕо биэрэпис лииһин электроннай көрүҥүнэн толорон, ыйытыкка бэйэтэ кыттар кыахтаах.
Биэрэпис иккис түһүмэҕэ алтынньы 16-31 күннэригэр үгэс быһыытынан ыытыллыаҕа – биэрэпиһи ыытааччылар Россия 9 субъегар 10 муниципальнай тэриллии сиригэр-уотугар дьиэлэри кэрийэн олохтоохтортон ыйытыахтара. Бу регионнар олохтоохторо анал биэрэпис учаастактарыгар ыйытыкка кыттыахтарын сөп.

Росстат
матырыйаалларынан.