9

05 октября 2018 в 11:44

Чернышевскайга хатыыһы үөскэтии саҕаланна

  «Чернышевскайдааҕы балыгы үөскэтэр собуот» ГУП иһинэн Сибиир хатыыһын Өлүөнэтээҕи популяциятын үөскэтэр сыах үөрүүлээх быһыыга-майгыга аһылынна.  

 

 

Бу иннинэ федеральнай тэрилтэлэри кытта улахан үлэ барбыта, «АЛРОСА» АХ, Мииринэй оройуонун администрацията өйөөбүттэрэ. «Саҥа салайааччы  Василий Александрович Черепанов үлэлиир кэмигэр собуот чыҥха атын буолан эрэр, биһиги тэрилтэҕэ улахан эрэлбитин сүктэрэбит. Бу өрөспүүбүлүкэҕэ балыгы үөскэтиигэ бастыҥ тэрилтэ», — диэтэ эҕэрдэ тылыгар Арктика дьыалаларыгар Саха Өрөспүүбүлүкэтин Судаарыстыбаннай кэмитиэтин бэрэссэдээтэлэ Прокопий Николаев.

Мииринэй оройуонун баһылыга Ришат Юзмухаметов этэринэн, икки сыллааҕыта балык собуота саахалланар туруктаах этэ. Оройуон дьаһалтата саҥа салайааччы көҕүлээһинин өйөөн, быйыл сайын балыгы үөскэтэр сыахха тэрили саҥардыыга, балыктааһыҥҥа, ону астааһыҥҥа, харайыыга  анаан төннөрүллүбэт төрүккэ 4 мөл. солк. биэрбит.

«Чугастааҕы кэмҥэ манна табаарынай оҥорон таһаарыы эмиэ олохтоохтук тэриллиэҕэ, онон мин, оройуоммут олохтоохторун уопсай баҕа санаатын эттэхпинэ, биһиги маҕаһыыннар долбуурдарыгар олохтоох хатыыс этин күүтэбит. Оройуон дьаһалтата балык собуота салгыы сайдыытын мэлдьи өйүөҕэ», — диэн Ришат Юзмухаметов бэйэтин этиитин түмүктээтэ.

Ил Түмэн депутата Юрий Николаев өрөспүүбүлүкэ баһылыга Айсен Николаев бастакы ыйааҕынан Саха сирин экологическай үтүө туругун туһунан ыйаах буолбутун, онон бүгүҥҥү түгэн бу ис хоһоонугар чопчу сөп түбэһэрин эттэ. Кини балыгы үөскэтэр собуот улахан кэскиллээҕин, Арктика дьыалаларыгар судаарыстыбаннай кэмитиэт, Ил Түмэн бары өттүнэн өйөбүлү оҥоруохтарын бэлиэтээтэ. Аалай лиэнтэни быһыыга, бочуоттаах ыалдьыттары таһынан, үлэ ветерана, собуокка 1971-2016 сс. үлэлээбит техник-рыбовод Светлана Иосифовна Федорова кыттыыны ылла.

Собуот директора Василий Черепанов бэйэтин ыалдьыттарыгар экскурсияны ыытта. Кинилэр Булуҥ улууһугар атырдьах ыйын 18 күнүттэн балаҕан ыйын 8 күнүгэр диэри Өлүөнэ өрүскэ балыктыыр учаастакка бултаммыт уонна “Анаабыр алмаастара” АУо вертолетунан аҕалыллыбыт хатыыстары көрдүлэр.   Собуокка барыта 28 хатыыс баар. Билигин балыктар олохтоох усулуобуйаҕа үөрэнэллэр, кинилэри тыыннаах чиэрбэлэринэн аһаталлар, ол кэннэ искусственнай аһылыкка – уотурбаҕа көһөрүөхтэрэ, ол саамай уустук түһүмэҕинэн буолуо диэн балыгы үөскэтээччилэр этэллэр. Ити үлэ өр буолара күүтүллэр. Үлэһиттэр барыта этэҥҥэ ааһарыгар эрэнэллэр.

Чернышевскайдааҕы балык собуота балык саппааһын үөскэтиинэн дьарыктанар өрөспүүбүлүкэҕэ соҕотох тэрилтэ буолар. Быйылгы сылга майаҕастыҥы боруодалар 30 мөлүйүөн ыамалара ыытыллыбыт. Саҥа сыаҕы үлэҕэ киллэрии түмүгэр сыллата Өлүөнэ өрүскэ хатыыс ахсаанын элбэтэр, ону сэргэ өрөспүүбүлүкэ ырыынагар 1 тоннаҕа диэри хатыыһы таһаарар кыаллыаҕа.