41

18 августа 2017 в 15:08

Чартернай рейсынан Японияттан 170 турист көтөн кэллэ

Атырдьах ыйын 15 күнүгэр Дьокуускай куорат аэропордугар Японияттан 170 турист көтөн кэллэ. ГАВС бэрэстэбиитэлэ этэринэн, бу Саха сирин историятыгар тас дойду бэрэстэбиитэллэригэр анаан оҥоһуллубут аан бастакы быһа рейс буолбут.

Сырыыны Саха сирин ГАВС «Дальгео Турс» салаата уонна Саха сирин уонна Япония икки ардыларыгар экономическай сыһыаннаһыылары сайыннарыыга корпоративнай пуонда бэлэмнээбиттэр. Пуонда бэрэссэдээтэлэ, делегация салайааччыта Кума Фумио иһитиннэрбитинэн, бөлөххө Хоккайдоттан саҕалаан Окинаваҕа диэри Тахсар күннээх дойду бары куораттарыттан 170 киирбит.
«Биһиги Владивосток уонна Хабаровскай туһунан билэбит. Оттон Саха сирин туһунан олох аҕыйах киһи билэр. Билигин дьоппуон туристара бэйэлэрин харахтарынан өрөспүүбүлүкэни көрөр, итиэннэ олохтоох компаниялары кытта бииргэ үлэлэһиини хайдах сайыннарар туһунан билсэр кыахтаннылар», — диэн бэлиэтээтэ ыалдьыт.


Кума Фумио туристар бары атын-атын гостиницаҕа тохтообуттарын кэпсээтэ. Кини Дьокуускайга бөдөҥ делегациялары көрсөр улахан гостиница тутулларыгар баҕарарын эттэ. Кума Фумио Японияҕа тиийэн баран мантан инньэ Саха сиригэр регулярнай быһа рейсы олохтуур туһунан кэпсэтиини ыытар былааннааҕын иһитиннэрдэ. Тоҕо диэтэр, дьоппуон туристара олус улахан интэриэстээхтэр эбит.

ЯСИА матырыйаалынан.