79

27 июля 2018 в 11:59

Айсен Николаев: «Оптимизация – бу үлэһиттэри сарбыйыы буолбатах»

Оптимизация боппуруоһа бүгүҥҥү күҥҥэ үгүс дьону долгутар, ордук тыа сиригэр. Бюджет үлэһиттэрэ саамай көмүскэллээх категорияҕа киирсэллэрэ биллэр. Оттон соторутааҕыта өрөспүүбүлүкэ Стратегическай чинчийиилэргэ киинэ бюджет тэрилтэлэригэр ыыппыт суруга дьоҥҥо мунаахсыйыыны үөскэттэ. Дьон оптимизацияны сарбыйыы быһыытынан өйдүүллэрэ үгэс буолбута балайда кэм ааста. Били “алдьаммыт төлөпүөн” бириинсибинэн, сыыһа өйдөнүллүбүт иһитиннэрии хаар үллүктүүрүн курдук, араас “үһү” диэн сурахтарынан туолла, дьону долгутта.

Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрбитинэн, Саха сирин Баһылыгын э.т. Айсен Николаев улуустарга сырыытын кэмигэр олохтоохтор ити боппуруоһу хаста эмэ туоһуластылар. Ол курдук, Мэҥэ-Хаҥалас улууһун Майа сэлиэнньэтигэр Дмитрий Ходулов аатынан народнай театр дьиэтин көрө сылдьыытыгар театр директора Спиридон Григорьев Айсен Николаевтан ити балаһыанньаны быһаарарыгар көрдөстө.
«Оптимизация – бу үлэһиттэри сарбыйыы буолбатах. Маннык сорук турбат, биһиги ону ким да иннигэр туруорбаппыт. Оптимизация – бу үлэ хаачыстыбатын тупсарыы уонна баар ресурсалары муҥутуур көдьүүстээхтик туһаныы, – диэн хоруйдаата Айсен Сергеевич. – Бэлиэтээн эттэхпинэ, өрөспүүбүлүкэ Стратегическай чинчийиилэргэ киинэ бюджет тэрилтэлэригэр булгуччу толоруллуохтаах дьаһаллары буолбакка, сүбэлээһиннэри ыытар. Ону хайдах табыгастаахтык оҥорору тэрилтэлэр бэйэлэрэ быһаарыахтаахтар».
Манна бюджет эйгэтин үлэһиттэрин сарбыйыы туһунан этиллибэт, салааҕа хаһаайынныы сыһыан туһунан этиллэр. Онон бүгүн хас биирдии бюджет тэрилтэтэ, хас биирдии оройуон көдьүүһэ суох төлөбүрдэри уонна ороскуоттары намтатыыга кэлим дьаһаллары оҥороллоро ирдэнэр.
Бастатан туран, үөрэх, социальнай-культурнай эйгэ тэрилтэлэрин баайдарын-дуолларын толору инвентаризациялааһын наадалаах, ол кэннэ ылыллыбыт дааннайдары Регистрационнай палаатаны кытта тэҥнээн көрүү суолталаах. Бюджет тэрилтэлэрин балаансатыгар баар эргэ туһаныллыбат тырааныспартан, дьиэлэртэн босхолонор, дьиэлэр, ол иһигэр спорт саалалара төһө ноҕуруускалаахтарын көрөн, муҥутуур туһаныахха наада. Ити барыта салаа үлэтин арыый көдьүүстээх оҥорор уонна бюджекка, ол иһигэр оҕолору үөрэтиигэ ороскуот сыанатын намтатар кыаҕы биэриэҕэ. Бүгүн сорох оскуолаларга ити ороскуот сылга биир үөрэнээччигэ 2 мөл. солк. диэри тиийэр, оттон норматива – 350-400 тыһ. солк. Манна толкуйдуурга уонна үлэлииргэ төрүөт баар.