17

02 ноября 2018 в 15:17

15 оҕолоох ийэни эҕэрдэлээһин

Герой-ийэ, тыыл ветерана Вера Свинобоева – Томпо оройуонугар саамай элбэх оҕолоох ийэ. Ийэ декадатын чэрчитинэн кинини оройуон уопсастыбаннай тэрилтэлэрин салайааччылара эҕэрдэлээтилэр.

Вера Константиновна кэргэнин, тыыл ветеранын, САССР үтүөлээх тренерэ, 91 саастаах Иннокентий Саввиһы кытта 9 уолу уонна 6 кыыһы төрөтөн, киһи-хара оҥорбуттар. Билигин ветераннар 14 оҕолорун уонна үгүс сиэннэрин, хос сиэннэрин ортотугар этэҥҥэ олороллор. Оҕолор араас идэлэри баһылаабыттар, ол иһигэр иитээччилэр, зоотехник, ветеринар, бухгалтер, суоппар, булчут, сантехник бааллар. Улахан уоллара Иннокентий Ыҥаа нэһилиэгин баһылыгынан үлэлээбитэ. Онон Свинобоевтар дьиэ кэргэттэрэ «Золотые семьи Якутии» кинигэҕэ киирбитэ түбэспиччэ буолбатах.
“Биир ньыгыл Россия Эдэр гвардията” уопсастыбаннай тэрилтэ Саха сиринээҕи салаатын Томпо оройуонугар түмсүүтүн салайааччыта Галина Канашова тыыннаах сибэкки дьөрбөтүн уонна СӨ Ил Түмэнин депутата Виктор Лебедев аатыттан сыаналаах бэлэҕи Свинобоевтарга туттарда. Кини норуот итэҕэллээҕин аатыттан эҕэрдэ тыллары аахта.
Томпо улууһун Герой-ийэтин оройуон дьа­һалтатын аатыттан со­циальнай боппу­руостар­га баһылыгы солбуйааччы Оксана Назаренко эҕэрдэлээтэ. Кини ветераннарга «Золотые семьи Якутии» кинигэни туттарда, онно бу улахан дьиэ кэргэн историята киирбит.
Томпо оройуонун ветераннарын сэбиэтин аатыттан Галина Готовцева эҕэрдэлээтэ, өйдөбүнньүк бэлэҕи туттарда. Оройуон дьахталларын сэбиэтиттэн Екатерина Скрыбыкина предприниматель Любовь Местникова “Тирэх” маҕаһыыныттан бэлэх аҕалбытын биэрдэ.