43

05 октября 2018 в 11:34

Спикер Петр Гоголев: “Ил Түмэн алтыс ыҥырыыта уопсастыбаннаска аһаҕас буолуоҕа”

Петр Гоголев иһитин­нэриини тарҕатар сириэстибэлэр салайааччыларын кытары көрсүһүүтүгэр: “Мин суруналыыстыка диэн тугун билэбин. 2000 сс. саҕаланыыларыгар “Ил Түмэн” хаһыакка Константин Федоров салайыытынан үлэлии сылдьыбытым”, — диэн бэлиэтээтэ. Көрсүһүү холку кэпсэтии быһыытынан барда.

 

 

Петр Гоголев спикер дуоһунаһыгар үлэтэ-хамнаһа хайдах саҕаламмытын, ханнык соруктар туралларын туһунан кэпсээтэ. “Бастакы түһүмэх, ол эбэтэр Ил Түмэн саҥа састаабын тэрийии үлэтэ түмүктэннэ. Сис кэмитиэттэр бэрэссэдээтэллэрэ, ис састааба талылыннылар. Инникитин үлэбит соруктара далааһыннаахтар”, — диэн эттэ. Петр Васильевич норуот депутаттара көҕүлүүр сокуон барылларын кэмитиэт иһинээҕи мунньахха дьүүллэһиинэн, ырытыһыынан муҥурдаммакка, бу боппуруоска улуус, куорат депутаттарын сэбиэтин көхтөөхтүк кыттыһыннарар, миэстэтигэр дьүүллэһэр наадатын туһунан бэлиэтээтэ. “Мин быыбарга кыттарбар бырагыраамам 9 бириинсиптэн, 9 соруктан уонна 18 бырайыактан турбута. Биир сүрүн бириинсиппинэн – дьон-сэргэ санаатын истии, ону кытары аахсыы этэ. Маны таһынан Ил Түмэн алтыс ыҥырыыта уопсастыбаннаска тиийимтиэ, этэргэ дылы, аһаҕас буолуоҕа”, — диэтэ.

“Сахамедиа” холдинг генеральнай дириэктэрэ Алексей Чертков Петр Васильевиһы эҕэрдэлээтэ уонна киэҥ аудиторияҕа көрдөрөр-иһитиннэрэр, сырдатар, дьүүллэһэр былаһааккатыгар сокуон оҥоһуллуутугар тахсар сытыы боппуруостарга кэлэн кыттарыгар ыҥырда.

Маны таһынан Алексей Чертков хотугу улуустар кыһалҕаларын боппуруоһугар Ил Түмэн алтыс ыҥырыыта хайдах үлэлэһэр былааннааҕын ыйытта. Петр Гоголев хотугу улуустар кыһалҕаларын саҥа билигин эрэ билэр буолбатаҕын, кини докторскай диссертациятын Арктика сирин-уотун, төрүт олохтоохторун кыһалҕаларын боппуруостарынан суруйбутун туһунан иһитиннэрдэ. “Хоту сир сытыы кыһалҕаларын билэбин, бу биһиги Сахабыт сирин кыһалҕата эрэ буолбатах, маныаха атылыы кыһалҕалар Арктика сиригэр-уотугар олорор төрүт олохтоохтору барыларын таарыйаллар. Биллэн турар, Ил Түмэн алтыс ыҥырыыта бу этиллибит кыһалҕалар тула үлэни күүскэ ыытыаҕа, бэһис ыҥырыы саҕалаабыт үлэтин салгыаҕа”, — диэн тоһоҕолоон эттэ.

“Саха” гостелерадиокомпания салайааччыта Харлампий Дьяконов  Петр Васильевичка тэрилтэтин аатыттан истиҥ эҕэрдэтин тиэртэ уонна федеральнай сокуону оҥорууга саҥа тэриллибит депутаттар корпустара хайдах кыттыһар былааннааҕын ыйытта. Маныаха Ил Түмэн спикера, бастатан туран, сокуон барыла ис хоһооно эҥкилэ суох буоларыгар болҕомто ууруллуоҕар туһаайда. Ол эбэтэр сокуон юридическай өрүтэ күүстээх буоларыгар, федеральнай мунньахха эрэлээхтик киллэрэр буолалларыгар кыһаллыахтара.

Көрсүһүү кыттыылаахтара алтыс ыҥырыыга утумнаах үлэни баҕардылар, спикер Петр Гоголев сонуну тарҕатар сириэстибэлэри кытары үлэлэһэргэ бэлэмнэрин туһунан иһитиннэрдэ.