11

02 ноября 2018 в 14:54

Юстиция управлениетын саҥа салайааччытын билиһиннэрии

Ил Түмэн Бэрэссэдээтэлэ Петр Гоголев РФ Юстицияҕа министиэристибэтин Саха Өрөспүүбүлүкэтигэр управлениетын саҥа салайааччыта Александр Бурхановы кытта көрүстэ.

Ил Түмэн спикеригэр Александр Александровиһы РФ Юстицияҕа министиэристибэтин Хабаровскай кыраайга уонна Еврейскэй автономнай уобаласка кылаабынай управлениетын начальнига Елена Нащëкина билиһиннэрдэ. Бу иннинэ Александр Бурханов РФ туһааннаах министиэристибэтин Самара уобалаһыгар управлениетыгар үлэлээбит, юрист идэтинэн 10-тан тахса сыл ыстаастаах.
Көрсүһүүгэ РФ Юстицияҕа министиэристибэтин СӨ-гэр управлениетын начальнигын э.т. Андрей Подрясов кыттыыны ылла.
Парламент спикерэ Петр Гоголев бэлиэтээбитинэн, бүгүҥҥү күҥҥэ Саха сирин парламена Россия Федерациятын регионнааҕы бэрэстэбиитэллээх уонна сокуону оҥорор былааһын систематыгар дьоһун миэстэни ылан туран, Россия парламентаризмын салгыы сайыннарыыга, бөҕөргөтүүгэ туһаайан үлэни ыытар соруктаах. Региоҥҥа үөскэтиллэр сокуон базата – бу хотугу өрөспүүбүлүкэ туруктаахтык сайдыытын тирэҕэ. Манна ылыллар нуормалыыр правовой аакталар регион материальнай уонна култуурунай кыахтарын олоххо киллэриигэ, инвестиция климатын тупсарыыга туһалыыллар.
Петр Гоголев РФ Юстицияҕа министиэристибэтин СӨ-гэр управлениетын салайааччыта Ольга Романованы кытта быйыл балаҕан ыйын бүтэһигэр көрсүбүтүн кэпсээтэ. Онно судаарыстыба политикатын оҥорууга уонна олоххо киллэриигэ итиэннэ нуорма-быраап өттүнэн сүрүннээһиҥҥэ, регионнааҕы сокуон барылларын олоххо киллэриигэ кэтээн көрүү уонна хонтуруоллааһын эйгэтигэр үлэни ыытар толорор былаас сүрүн уорганын кытта бииргэ үлэлээһин боппуруостара дьүүллэһиллибиттэрэ. Ил Түмэн спикерэ өрөспүүбүлүкэ парламена биэдэмистибэни кытта үлэ араас эйгэлэригэр сыһыаннаһыылары сокуон өттүнэн сүрүннээһиҥҥэ ыкса үлэлииргэ бэлэмин бэлиэтээтэ.
Парламентарий тулалыыр эйгэни харыстааһыны уонна айылҕаны сөптөөхтүк туһаныыны хааччыйыы политикатын утумнаахтык ыытыыга болҕомтону туһаайда. Биллэрин курдук, нэһилиэнньэ олоҕун таһыма уонна доруобуйата тулалыыр эйгэ хаачыстыбатын кытта быһаччы сибээстээх.
Петр Васильевич алтыс ыҥырыылаах Судаарыстыбаннай Мунньах үлэтин былааннарыгар тохтоото. Хаһаайыстыбаннай уонна да атын үлэлэрэ тулалыыр эйгэҕэ буортуну оҥоруон сөп объектары Саха сиригэр олохсутууну кытта сибээстээх боппуруостары көрүү депутаттар үлэлэригэр биир бастакы суолталаах хайысханан буолуоҕа. Кэнэҕэс өрөспүүбүлүкэ сиригэр-уотугар техногеннай ноҕурууска үрдээн иһиэҕэ, онон экологическай проблемалары учуоттааһыҥҥа улахан суолта бэриллиэҕэ бэлиэтэннэ.
Бэйэтин өттүттэн, Александр Бурханов Судаарыстыбаннай Мунньаҕы кытта олохтоммут сыһыаннаһыылары үрдүктүк сыаналыырын уонна салгыы икки өрүттээх бииргэ үлэлээһин үрдүк таһымҥа сайдыытыгар бэлэмин биллэрдэ.

Ил Түмэн пресс-сулууспата.