Просмотров - 10

14 июля 2017 12:28

Сербия парламенын депутата Драгомир Карич — Саха сиригэр

Ил Түмэн пресс-сулууспата иһитиннэрбитинэн, парламент Бэрэссэдээтэлэ Александр Жирков от ыйын 10 к. Сербия Өрөспүүбүлүкэтин Народнай Скупщинатын депутата Драгомир Кариһы кытта көрүстэ. Көрсүһүүгэ СӨ судаарыстыбаннай сүбэһитэ, Саха сирин бастакы Президенэ Михаил Николаев кыттыыны ылла.

Драгомир Карич Ил Түмэн спикеригэр 2016 сылга талыллыбыт Сербия парламенын үлэтин тирээн турар боппуруостарын туһунан кэпсээтэ. Кини Александр Жирковка иһитиннэрбитинэн, 2016 сыл бүтүүтүгэр Сербия Скупщинатын атын дойдулар дьыалаларыгар Кэмитиэтэ араас дойдулары кытта доҕордоһууга парламент 62 бөлөҕүн талбыт. Россияны кытта доҕордоһуу бөлөҕүн “Сербия прогрессивнай партиятыттан” депутат Александра Джурович салайар. Драгомир Карич («Сила Сербии» хамсааһын) бу бөлөҕү салайсар.
Драгомир Карич СӨ Ил Түмэ­нин уонна Воеводина (Сербия хоту өттүгэр автономнай кыраай) Скупщинатын (Парламенын) икки ардыларыгар парламеннар сибээстэрин олохтуур кыаҕы көрөргө этии киллэрдэ.
Александр Жирков Россия Федера­цията Сербия Өрөспүү­бүлүкэ­тин кытта экономикаҕа уонна култуураҕа сибээстэрин сайыннарыы суолталааҕын итиэннэ парламеннар икки ардыла­рынааҕы бииргэ үлэлээ­һин политика, экономика уонна култуура эйгэлэригэр сыһыанна­һыылар сайдыыларыгар эбии тэтими биэриэ­ҕин бэлиэтээтэ.
Көрсүһүү түмүгэр Драгомир Карич Саха сирин парламенын спикеригэр сылаастык көрсүбүттэрин иһин махтанна.
Санатар буоллахха, 25 сыллаа­ҕыта Саха сирин бастакы Президенэ Михаил Николаев көҕүлээһининэн СӨ медицина Национальнай киинин, Педиатрическай киин, СГУ ЕНФК тутуулара саҕаламмыта, олорго бырааттыы Каричтар хампаанньалара кыттыыны ылбыта.
Ити иннинээҕи күн Сербия депутата М.К.Аммосов аатынан ХИФУ-ка сылдьан университет салалтатын кытта көрүстэ. Драгомир Карич үөрэх тэрилтэтин профессордарын, преподавателлэрин уонна научнай-чинчийэр састаабын профессиональнай таһыма үрдүгүн бэлиэтээтэ. «Биһиги эһиги университеккытын кытта уруккуттан сибээстэһэбит. Баҕа баар буоллаҕына, ХИФУ уонна Белград судаарыстыбаннай университетын икки ардыларыгар атастаһыы бырагыраамаларын оҥоруохха сөп дии саныыбын”, — диэтэ кини.
Итини сэргэ Драгомир Карич бырааттыы Каричтар хампаанньалара кыттыылаах тутуллубут объектары көрдө, кинилэр техническэй туруктарын үчүгэйинэн сыаналаата.
Россия Федерацията Сербия Өрөспүүбүлүкэтин кытта экономикаҕа уонна култуураҕа сибээстэрин сайыннарыы чэрчитинэн, быйыл бэс ыйын 9-12 күннэригэр Белград чугаһыгар баар Прогар куорат Бойцинскай пааркатыгар Саха сирэ Россия судаарыстыбатын састаабыгар киирбитэ 385 сылыгар уонна саха литературатын төрүттээччи А.Е.Кулаковскай – Өксөкүлээх Өлөксөй төрөөбүтэ 120 сылыгар аналлаах Ыһыах буолан ааста. Ыһыаҕы ыытыыны бу Балкан дойдутугар олорор улуу суруйааччы сиэнэ Лариса Кулаковская көҕүлээбитэ. Онуоха анаан-минээн Саха сириттэн үс фольклорнай ансаамбыл көтөн кэлбитэ – Хаҥалас улууһуттан «Дьүрүһүй» (Уулаах Аан), «Эрэл» (Өктөм) уонна Дьокуускай к. “Оһуохай” уопсастыбатыттан. Маны сэргэ Европа дойдуларыттан – Англияттан, Бельгияттан, Чехияттан, Германияттан уо.д.а. Саха сирин дьоно кэлбиттэрэ. Саха омук бырааһынньыгын ыалдьыттара уонна кыттыылаахтара сэргэ туруорбуттара, мас тардыһыытыгар уонна саха сиэригэр-туомугар кыттыбыттара.