35

08 мая 2019 в 13:27

Өрөспүүбүлүкэ элбэх оҕолоохторун ахсаана эбиллиэн сөп

 

Муус устар 30 к. “Саха Өрөспүүбүлүкэтигэр элбэх оҕолоох дьиэ кэргэн статуһун туһунан” сокуон барылын иккис ааҕыыга бэлэмнээһиҥҥэ оробуочай бөлөх мунньаҕа буолан ааста.

 

Мунньаҕы Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ Алена Атласова салайан ыытта.

Боппуруоһу дьүүллэһиигэ парламент наукаҕа, үөрэххэ, култуураҕа, сонуну тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева, үлэ, үп, доруобуйа харыстабылын, үөрэх министиэристибэлэрин салайааччылара, бэрэстэбиитэллэрэ кытыннылар.

Алена Атласова бэлиэтээбитинэн, оробуочай бөлөх өрөспүүбүлүкэ судаарыстыбаннай бюджетыттан ороскуоттары ааҕарыгар-суоттууругар, ороскуот эбэһээтэлистибэлэрин саҥа көрүҥнэрин источниктарын уонна толоруу бэрээдэгин быһаарарыгар сорудах бэриллибит.

Ил Түмэн дьиэ кэргэн уонна оҕо аймах дьыалаларыгар сис кэмитиэтэ сокуон барылыгар көннөрүүлэри ыам ыйын 22 к. диэри ылар. Ол кэнниттэн кэмитиэт киирбит этиилэри учуоттаан докумуону ситэрэн баран, бэс ыйыгар Судаарыстыбаннай Мунньахха иккис ааҕыыга киллэриэхтээх.

Билигин Саха сиригэр элбэх оҕолооҕунан 18 саастарын туола илик 3 уонна онтон элбэх оҕолоох ыал билиниллэр. Сокуон барылыгар ити өйдөбүлү кэҥэтэн, онно 23 саастарын туолбут, күнүскү үөрэххэ сылдьар эбэтэр байыаннай сулууспаҕа ыҥырыллыбыт оҕолоох ыаллары киллэрэргэ этиллэр. Сокуон барыла 2019 сыл бастакы аҥаарыгар ылыллара былааннанар.

Сокуону ылыныы өйөбүл хас да дьаһалларынан туһанар элбэх оҕолоох ыаллар ахсааннарын кэҥэтиэҕэ: ол курдук, кинилэр сыллата оскуолаҕа кэтэр таҥас комплегын атыылаһалларыгар төлөбүрү ылаллар, оскуолаҕа үөрэнэр оҕолорго аһылык хааччыллар, 6-гар диэри саастаах оҕолорго эмп бэриллэр, тус сыаллаах үөрэнэр устудьуоннары өйүүллэр, театрдарга, музейдарга, спорт объектарыгар босхо сылдьаллар, элбэх оҕолоох дьиэ кэргэн түөскэ иилинэр бэлиэтэ уонна дастабырыанньа бэриллэр.

Биэдэмистибэлэр икки ардыларынааҕы оробуочай бөлөх чилиэннэрэ бюджет ороскуоттарыгар оҥоһуллубут суоттааһыннарга, эбии источниктары, дотацияны быһаарыыга, сокуон күүһүгэр киириитин болдьоҕор санааларын эттилэр.

«Сокуон иккис уонна бүтэһик ааҕыыга ылылыннаҕына, биһиги Саха сиригэр элбэх оҕолоох ыалларга социальнай өйөбүл дьаһаллара биир көрүҥнээх буолалларын ситиһиэхпит. Өрөспүүбүлүкэ баһылыга Айсен Николаев Ил Түмэн кулун тутар ыйдааҕы пленарнай мунньаҕар бастакы ааҕыыга ылыллыбыт сокуон барылын концепциятын өйөөбүтэ итиэннэ өрөспүүбүлүкэ бюджетыгар ороскуоттары ааҕыыга уонна ороскуот эбэһээ­тэлистибэлэрин үбүлээһин источниктарын быһаарыыга регион бырабыыталыстыбатын кытта кыттыһан үлэлииргэ этии оҥорбута. Бу сокуон барылын уопсастыбаннас, бастатан туран, элбэх оҕолоох дьиэ кэргэттэр күүтэллэр. Бары тэрээһиннэргэ быыбардааччылар сокуон барыла хаһан ылылларын уонна күүһүгэр киирэрин туоһулаһаллар», — диэтэ Ил Түмэн сис кэмитиэтин бэрэссэдээтэлэ Алена Атласова.

Парламентарий боппуруоһу ымпыктаан-чымпыктаан үөрэтэр туһугар дааннайдары, чопчу суоттааһыннары Үлэ министиэристибэтигэр киллэрэллэригэр уонна кэлэр мунньаҕы бырааһынньыктар кэннилэриттэн ыытар туһунан туһааннаах министиэристибэлэргэ этии оҥордо.

Билигин өрөспүүбүлүкэҕэ 27 тыһ. кэриҥэ элбэх оҕолоох дьиэ кэргэн баар. Барыллааһын сыанабылынан, сокуон ылыллыытын түмүгэр чэпчэтиинэн туһанааччылар ахсааннара 5 тыһ. элбэх оҕолоох ыалынан үрдүөн сөп.

 

Ил Түмэн пресс сулууспатын матырыйаалынан

Поделиться