9

12 октября 2018 в 11:15

Ил Түмэн Сэбиэтин мунньаҕар

Саха сирин парламенын спикерэ Петр Гоголев салайыытынан 2018 с. алтынньы 8 к. Судаарыстыбаннай Мунньах (Ил Түмэн) Сэбиэтин мунньаҕа буолан ааста. Манна алтыс ыҥырыы иккис (уочараттаах) пленарнай мунньаҕын алтынньы 18-19 күннэригэр ыытыы тэрээһин боппуруостара көрүлүннүлэр.

Бастакы боппуруоһунан Ил Түмэн иккис (уочараттаах) пленарнай мунньаҕын бэбиэскэтин барыла дьүүллэһилиннэ. Мунньах чэрчитинэн Саха Өрөспүүбүлүкэтин Баһылыга парламеҥҥа өрөспүүбүлүкэ Бырабыыталыстыбатын Бэрэссэдээтэлин, кини бастакы солбуйааччыларын уонна солбуйааччыларын, ону сэргэ министиэристибэлэр салайааччыларын дуоһунастарыгар кандидатураларга этии киллэриэҕэ. Ити кандидатуралар парламеҥҥа сөбүлэһиини ааһыахтара.
Итини таһынан мунньахха алта сокуон барыла, ол иһигэр быйылгы сыллааҕы уонна 2019-2020 сс. былааннаммыт кэмҥэ өрөспүүбүлүкэ судаарыстыбаннай бюджетыгар уларытыылары киллэрэр туһунан СӨ Сокуонун барыла көрүллүөҕэ. Икки сокуон барыла иккис ааҕыыга көрүллүөҕэ: «Административнай сокуону кэһиилэр тустарынан Саха Өрөспүүбүлүкэтин Кодексыгар уларытыылары киллэрэр туһунан» уонна «Нолуок политикатын туһунан» Саха Өрөспүүбүлүкэтин Сокуонугар уларытыылары киллэрэр туһунан». Маны сэргэ Ил Түмэн кэккэ уураахтара көрүүгэ таһаарыллыахтара.
Ил Түмэн Сэбиэтигэр парламентарийдар иккис боппуруоһунан Саха сирин парламенын сис кэмитиэттэрин уонна хамыыһыйатын састааптарыгар уларытыылар тустарынан Судаарыстыбаннай Мунньах уурааҕын барылын бэлэмнээһин хаамыытын итиэннэ “Саха Өрөспүүбүлүкэтин алтыс ыҥырыылаах Судаарыстыбаннай Мунньаҕын (Ил Түмэн) сис кэмитиэттэрин уонна хамыыһыйатын састааптарын туһунан” Ил Түмэн уурааҕар уларытыылары киллэриини дьүүллэстилэр.
Мунньаҕы түмүктээн, СӨ Судаарыстыбаннай Мунньаҕын (Ил Түмэн) Бэрэссэдээтэлэ Петр Гоголев Сэбиэт кыттыылаахтарыгар сүбэлэһэр уорган сыалларын-соруктарын кытта сиһилии билсэргэ, ол иһигэр сокуон барылларыгар үлэ былаанын оҥорууга, бырабыыталыстыба чаастарын уо.д.а. тэрээһиннэри ыытыыга этиилэри толкуйдуурга сорудахтаата. Спикер бэлиэтээбитинэн, Сэбиэт аныгыскы мунньаҕа киэҥ ыҥырыылаах буолуоҕа, ол курдук сис кэмитиэттэр уонна хамыыһыйа бэрэссэдээтэлин солбуйааччыларынан саҥа талыллыбыт депутаттар мунньахха кыттыахтара.