31

10 июля 2017 11:18

Бултуур сирдэргэ гектары биэрии тула

Парламент пресс-сулууспата иһитиннэрбитинэн, Ил Түмэн XXX пленарнай (уочараттаах) мунньаҕар норуот депутаттара “Уһук Илин федеральнай уокурук састаабыгар киирэр Россия Федерациятын субъектарын сирдэригэр-уоттарыгар судаарыстыбаннай эбэтэр муниципальнай бас билиигэ баар сир учаастактарын гражданнарга биэрии уратыларын туһунан” Федеральнай сокуоҥҥа итиэннэ Россия Федерациятын сорох сокуонун аакталарыгар уларытыылары киллэрэр туһунан” уонна “Хамсаабат баайы-дуолу судаарыстыба регистрациялааһынын туһунан” Федеральнай сокуоҥҥа уларытыылары киллэрэр туһунан” 188813-7 №-дээх федеральнай сокуон барылыгар СӨ Судаарыстыбаннай Мунньаҕын (Ил Түмэн) харда этиитин туһунан” СӨ Ил Түмэнин уурааҕын барылын бигэргэттилэр.

Сокуон барылын көрөн баран, Ил Түмэн депутаттара федеральнай сокуон барылын 1 ыстатыйатын 5 пуунунан “Уһук Илин федеральнай уокурук састаабыгар киирэр Россия Федерациятын субъектарын сирдэригэр-уоттарыгар судаарыстыбаннай эбэтэр муниципальнай бас билиигэ баар сир учаастактарын гражданнарга биэрии уратыларын туһунан” Федеральнай сокуоҥҥа итиэннэ Россия Федерациятын сорох сокуонун аакталарыгар уларытыылары киллэрэр туһунан” 2016 с. ыам ыйын 1 к. 119 №-дээх Федеральнай сокуон 7 ыстатыйатын 16 пуунун саҥа редакцията этии киллэриллибитин бэлиэтээтилэр. Ол редакция быһыытынан, ыйыллыбыт сир учаастагар булт инфраструктуратын объега баар түгэнигэр бултуур сирдэр чэрчилэринэн баар сир учаастагын гражданин босхо туһаныытыгар биэрэртэн аккаастыахтарын сөп.
Саха сиригэр 365 бултуур сирдэри туһанааччыттан 362-тэ Хамсаабат баай бүттүүн биир реестригэр регистрацияламматах уонна кадастр картатыгар тыктарыллыбатах бултуур сирдэригэр харамай эйгэтин туһаныыга уһун болдьохтоох лицензияларга олоҕуран бултууллар. Ити булт баайыгар сыһыаннаан харамай эйгэтин туһаныыга уһун болдьохтоох лицензиялар төрүттэригэр сир уонна ойуур учаастактарын арендаҕа биэрии сокуонунан көрүллүбэтэҕин кытта сибээстээх, ону таһынан, РФ Конституционнай суутун 2015 с. бэс ыйын 25 к. 17-П №-дээх уурааҕынан уһун болдьохтоох лицензиялары булт хаһаайыстыбатын сөбүлэһиилэригэр уларытан оҥорууга бобуу олохтоммута, туһааннааҕынан ойуур учаастактарын арендалааһыҥҥа дуогабардар түһэрсиллибэтэхтэрэ.

Онон билигин үлэлиир сокуонунан бултуур сирдэр чэрчилэригэр баар сир учаастактарын босхо туһаныы, аренда эбэтэр бас билии быраабыгар көһөрүү механизма көрүллүбэт.
119 №-дээх Федеральнай сокуон 7 ыстатыйатын 16 пуунун саҥа редакцията гражданнар ханнык баҕарар көҥүллэнэр сыалга туһаныыларыгар анаан сир учаастактара бэриллэр бултуур сирдэргэ булчуттар бырааптарын хааччахтыыр, федеральнай сокуоннарга сөп түбэспэт.
Итинтэн сиэттэрэн, Ил Түмэн депутаттара сокуон барылыгар уларытыылары киллэрэргэ этэллэр. Ити уларытыылар бултуур сирдэр кыраныыссаларыгар баар сир учаастактарын юридическай сирэйдэр эбэтэр чааһынай предпринимателлэр харамай эйгэтин уһун болдьохтоох лицензияҕа, булт хаһаайыстыбатын сөбүлэһиитигэр олоҕуран туһаныыларыгар эбэтэр ыйытыллар сир учаастага харамай эйгэтин туһаныыга уһун болдьохтоох лицензияҕа, булт хаһаайыстыбатын сөбүлэһиитигэр эбэтэр судаарыстыбаннай-чааһынай бииргэ үлэлээһин сөбүлэһиитигэр сөп түбэһиннэрэн, арендаҕа бэриллиэхтээҕэр сыһыаннаахтар.
Ону сэргэ Ил Түмэн депутаттара федеральнай сокуон барылыгар 4, 5 ыстатыйалары эбии киллэрэргэ этии оҥордулар. Бу эбиилэргэ эмиэ харамай эйгэтин уһун болдьохтоох лицензияҕа, булт хаһаайыстыбатын сөбүлэһиитигэр олоҕуран туһаныыга сы­һыаннаах РФ Ойуурун, Сирин кодекстарыгар уларытыылар бааллар. 2009 с. от ыйын 24 к. 209 №-дээх булт туһунан Федеральнай сокуоҥҥа эмиэ туһааннаах уларытыылары киллэрэргэ этиллэр.
Өрөспүүбүлүкэ парламентарийдара Ил Түмэн ити уурааҕын Госдума айылҕа ресурсаларыгар, бас билиигэ уонна сир сыһыаннаһыыларыгар кэмитиэтигэр ыытарга быһаардылар. Ону сэргэ 188813-7 №-дээх федеральнай сокуон барылыгар СӨ Ил Түмэнин этиилэрин учуоттаан, Госдума депутаттара Галина Данчикова, Федот Тумусов, Федерация Сэбиэтин чилиэннэрэ Александр Акимов, Вячеслав Штыров көннөрүүлэри Госдума көрүүтүгэр киллэрэллэригэр этилиннэ.