86

25 января 2019 в 16:19

Бэһис пленарнай мунньах бэбиэскэтэ

Өрөспүүбүлүкэ парламенын спикерэ Петр Гоголев 2019 с. тохсунньу 30-31 кк. буолуохтаах бэһис (уочараттаах) пленарнай мунньах бэбиэскэтин барылыгар илии баттаата.

 

Бэбиэскэ барылыгар 21 боппуруос киллэриллибит. Норуот итэҕэллээхтэрэ өрөспүүбүлүкэ сокуоннарыгар уларытыылары киллэрэр туһунан маннык сокуон барылларын көрүөхтэрэ: «Саха Өрөспүүбүлүкэтигэр стратегическай былааннааһын туһунан»; «Саха Өрөспүүбүлүкэтигэр бырамыысыланнас политикатын туһунан»; «Саха Өрөспүүбүлүкэтин муниципальнай оройуоннарын уонна куораттааҕы уокуруктарын олохтоох салайыныыга уорганнарыгар тыа хаһаайыстыбатын оҥорон таһаарыытын өйөөһүҥҥэ сорох судаарыстыбаннай боломуочуйалары аныыр туһунан»; «Агропромышленнай комплекс үлэһиттэригэр санаторийга-куруорка эмтэниигэ судаарыстыба өйөбүлүн дьаһалларын туһунан»; «Саха Өрөспүүбүлүкэтин сиригэр-уотугар элбэх квартиралаах дьиэлэргэ уопсай баайы-дуолу хапытаалынай өрөмүөннээһини ыытыыны тэрийии туһунан»; «Саха Өрөспүүбүлүкэтигэр дьон олорор сиригэр тутуу политикатын туһунан»; «Саха Өрөспүүбүлүкэтигэр үөрэхтээһин туһунан»; «Сокуоннай саастарын туола иликтэр дьыалаларыгар уонна кинилэр бырааптарын көмүскээһиҥҥэ хамыыһыйалар тустарынан»; «Саха Өрөспүүбүлүкэтигэр коррупцияны утары охсуһуу туһунан»; «Саха Өрөспүүбүлүкэтин тулалыыр эйгэтин харыстааһын туһунан»; «Саха Өрөспүүбүлүкэтин ураты харыстанар айылҕатын сирин-уотун туһунан»; «Саха Өрөспүүбүлүкэтигэр депутат, олохтоох салайыныы талыллар уорганын чилиэнин, олохтоох салайыныы талыллар дуоһунастаах сирэйин боломуочуйаларын олоххо киллэрии мэктиэлэрин туһунан».

Ону таһынан, Хоту сир аҕыйах ахсааннаах төрүт олохтоох норуоттарыгар сыһыаннаах терминнэри биир көрүҥнээһин чааһыгар СӨ административнай сокуону кэһиилэр тустарынан Кодексыгар уонна СӨ сорох сокуонун аакталарыгар көннөрүүлэр киллэриллиэхтэрэ.

Бэһис пленарнай мунньах кэмигэр Ил Түмэн маннык уураахтарын көрүү уонна быһаарыылары ылыныы былааннанар: «Саха Өрөспүүбүлүкэтин ньиэп уонна гаас бырамыысыланнаһын үтүөлээх үлэһитэ» Саха Өрөспүүбүлүкэтин бочуоттаах аатын туһунан»; «Бүлүү өрүс тардыытыгар экологическай быһыы-майгы туһунан» темаҕа парламент истиилэрин рекомендацияларын туһунан»; «Мас-рестлинг сайдыытын проблемалара уонна кэскиллэрэ» темаҕа “төгүрүк остуол” рекомендацияларын туһунан»; «Саха Өрөспүүбүлүкэтин спортивнай резервэтин бэлэмнээһин тиһигин саҥардыы» темаҕа парламент истиилэрин рекомендацияларын туһунан».

Пленарнай мунньах бэбиэскэтин бүтэһигэр федеральнай сокуоннар барыллара, РФ субъектарын судаарыстыбаннай былааһын сокуону таһаарар (бэрэстэбиитэллээх) уорганнарын сокуону көҕүлээһиннэрэ уонна ыҥырыылара көрүллүөхтэрэ.

 

Ил Түмэн пресс-сулууспата

 

Поделиться