459

25 декабря 2015 в 17:59

“Тойук” 290 киһи харчытын апчарыйда дуо?

Соторутааҕыта редакцияҕа “Тойук” ТХКПК-гар бырыһыаҥҥа харчы уурдараары харчыларыттан маппыт дьон ааттарыттан сурук киирбитэ. Ол суругу толору бэчээттиибит.

“Тойук” – коррупционер!!!

Биһиги, тыа дьоно эрэй­дээхтэр, ханнык да ханаалынан харчы мунньунар кыахпыт суох буолан, массыына эбэтэр оҕолорбут, сиэннэрбит Дьокуускай куоракка олорон үөрэнэллэригэр кыбартыыра дуу, чааһынай дьиэ дуу атыылаһыахпыт диэн харчы мунньунарга санаммыппыт.
2012-2014 сылларга “Тойук” ТХКПК бэйэтин рек­ламаланан — “Ким баҕалаах үрдүк бырыһыаҥҥа харчы уган үүннэриэххитин сөп” — диэн буолбута.
Саатар эрэ дуо, биһиги бары да кэриэтэ баар-суох үлэлээбит харчыбытын, ынах сүөһүбүтүн, сылгы­бытын өлөртөөн, харчыга уларытан, “Тойук” коопе­ративка укпуппут. Коо­ператив 2-3 сыл үчүгэйдик үлэлээбитэ, 7-8 улууска филиалламмыта. Онтон 2015 сыл күһү­нүгэр фи­лиалларын уурата­лаа­быта. Дьэ, ол кэнниттэн республика үрдүнэн, быһа холуйан, 290 клиент харчыбытын аахсан ылар кыаҕа суох хааллыбыт. Эгэ, бырыһыана төлөнүө дуо?
Бу норуот ууруммут хар­чыта ханна барда?! Тоҕо тустаах дьон эп­пиэккэ тардыллыбатый? Эппиэтинэстэн куотунан аата эрэ үлэлии олороллор! Биһиги харчыбыт үүммүт бырыһыанын бэйэлэригэр ыла олороллор. Респуб­лика үрдүнэн быһа холоон 290 киһи иэдээҥҥэ тү­бэстэ. Баар-суох уурунуу харчыбытын сүтэрдибит, түгэҕэ суох иэдээҥҥэ киирэн биэрдибит!
Маннык ыраах улуус­тартан бары Дьокуускайга тиийэн быһаарсар кыахпыт суох. Сөптөөх хоруйу ылбаппыт да чуолкай. Нэһилиэктэргэ норуот айманыыта бөҕө буолла. Ити этиллибит 290 киһи 100.000 тыһ. солкуобайтан 1.000.000 солкуобайга диэри уурунуулаахтара.
Биһиги маннык этиилээхпит:
— Бары биирдиилээн сүүрэн-көтөн дьыаланы быһаарсар кыахпыт суох.
Бу сурук “Ил Тү­мэн” депутаттарын, Бы­рабыыталыстыба сала­йааччыларын, Ил Дархан Е.А.Борисов дьүүлүгэр туран, бу 290 пайщиктаах дьон биэрбит суумабытын төннөрөргүтүгэр көрдө­һөбүт уонна этии киллэ­рэбит. Ол кэнниттэн “Тойук” кооперативы кыт­та бэйэҕит кэпсэтэргит, быһаарсаргыт наада буо­луо. “Тойук” үүннэрэ сытар харчытын эһиэхэ төлүү­рүгэр модьуйуҥ. Рес­публика салалтата норуот туһугар үлэлиэ диэн эрэнэ хаалабыт.

Бүлүү, Үөһээ Бүлүү улуустарын харчыларын сү­тэр­бит дьонун ааттарыттан Иван Николаевич Иванов.

Үөһээ Бүлүү с.

Редакцияттан:

Ил Түмэн Хонтуруоллуур кэмитиэтин бэрэс­сэдээтэлэ Александр Уаров суругу ааҕан баран, албыннаппыт дьон толору испииһэгин оҥорон, кинилэр ааттарыттан Прокуратураҕа сурук киллэрэр наадалааҕын эттэ. Ол сурукка кыһалҕаҕа түбэспит дьон бука бары илии баттыахтаахтар. [/justify]