Просмотров - 23

11 сентября 2017 16:18

Биир дойдулаахтарын алгыстарынан

Ил Тү­мэн биэс ыҥырыылаах м­унньаҕын депутата, Хо­нтуруоллуур кэмитиэт ­бэрэссэдээтэлэ Алекса­ндр УАРОВ төрөөбүт Сунтаарын кытары ситимэ бигэ. Кини биир дойдулаахтарын кытары көрсөр уонна кинилэр үөрүүлэрин-хомолтолорун кытары үллэстэр үгэстээх. Тыа дьонун кыһалҕаларын истэн, быһаарарга кыһаллар үтүө үөрүйэхтээх. Бүгүн “Дьокутаат уокуругар” балаһаҕа Александр Уаров туһунан дьон санаатын уонна депутат үлэтин уһансар суолугар үөрэх кыһатыгар бииргэ үлэлии сылдьыбыт коллегатын Василий Никитич Евсеевка анаммыт ахтыытын таһаарабыт.

Дьон махтала – улахан чиэс

Киһи сырыттаҕына сылдьар. Хаһан баҕарар араас түгэн буолуон сөбүн ким даҕаны мэктиэлээбэт. Биир оннук түбэлтэ туһунан ааҕааччыларга билиһиннэррим. Ил Түмэн дьокутаата Александр Уаров бэс ыйын 30 күнүгэр, бээтинсэҕэ, үлэлии олордоҕуна Сунтаартан эрийэн Андреева Аграфена Степановна улаханнык ыалдьыбытын, оройуон кылаабынай бырааһа Дьокуускайга ыытаары көрдөспүтүн «миэстэтэ суох» диэн аккаастаабыттарын туһунан этэн туран, төһө кыалларынан көмөлөһөрүгэр көрдөспүттэр.
Дьокутааппыт сонно тута, үлэлии олорор дьыалатын тохтотон, өрөспүүбүлүкэтээҕи балыыһа кылаабынай бырааһа Борис Витальевич Андреевтыын кэпсэппит, көрдөспүт, тылын ылыннарбыт. Ол түмүгэр ыарыһаҕы Сунтаартан Дьокуускайга санитарнай эриэйсэнэн аҕалан, балыыһаҕа киллэрбиттэр. Өскөтүн ол күн дьокутааппыт кыайан кэпсэппэтэҕэ, быһаарсыбатаҕа буоллар, ыарахан ыарыһах Сунтаарга төһө өр сытыа, хайдах балаһыанньалаах буолуо биллибэт. Сарсыныгар ыарыһах дьоно дьокутаат Александр Сергеевичкэ төлөпүөнүнэн эрийэн улахан махталларын биллэрбиттэр, инники даҕаны өттүгэр итинник кыһалҕалаах дьоҥҥо көмөлөһө турарыгар баҕарбыттар.

Иван ЧАГДИНСКАЙ
(«Сунтаар сонуннара» хаһыат, №52 (9675), от ыйын 7 күнэ)

Хомолтобун этэбин

Сунтаар дьоно-сэргэтэ улаханнык итэҕэйэн, эрэнэн Ил Түмэҥҥэ биэс ыҥырык тухары дьокутаанынан талбыт киһилэрэ А.С. Уаров төрөөбүт-үөскээбит Сунтаарын, өрөспүүбүлүкэтин туһугар кыаҕа тиийэринэн таһаарыылаахтык, кимиилээхтик үлэлии сылдьар. Ордук боростуой дьоҥҥо олус чугас, кинилэр кыһалҕаларын быһаарыыга кыһаллар. Биир холобур быһыытынан былырыын биһиги кыыспыт ыараханнык ыалдьыбытын Кореяҕа ыытан эмтэппитэ.
Мин бу кылгас сурукпар аҕыйах хонуктааҕыта Дьокуускайга буолбут Сунтаар ыһыаҕар биир суолтан хомойбуппун биир дойдулаахтарбар тириэрдиэхпин баҕарабын. Сунтаардар бары киэн туттар дьокутааппытыгар А.С. Уаровка, биир дойдулаахтарын, кэлбит ыалдьыттары эҕэрдэлээри гыммытыгар, тэрийэр хамыыһыйа дьоно тыл биэрбэтилэр. Бу түбэлтэттэн Сунтаар үгүс дьоно улаханнык хомойдулар. Инники өттүгэр маннык биллэр дьоммутун харыстыаҕыҥ, кинилэргэ ытыктабыллаахтык сыһыаннаһыаҕыҥ диэн санааттан улууһум хаһыатыгар бу суругу ыыттым.

Иван ИВАНОВ,
Сунтаартан төрүттээх куорат олохтооҕо
(«Сунтаар сонуннара» хаһыат, №52 (9675), от ыйын 7 күнэ)

Дьокутаатым туһунан санаа

Биһиги, сунтаардар, 5 ыҥырыкка толору Ил Түмэҥҥэ норуотун интэриэһин өрө тутан кэлбит Уаров Александр Сергеевиһинэн киэн туттабыт, биһиги эрэ буолбакка, бүтүн саха норуота. Мин сыыстарбат буоллахпына, Александр Николаевич Жирковтуун итинник итэҕэли, ытыктабылы иккиэн ылыахтарын ылаллар.
Александр Сергеевич Ил Түмэҥҥэ дьокутааттыырын тухары боростуой тыа сахата тирэхтээх, көмүскэллээх буолуоҕа диэн бигэ эрэллээхпин. Тоҕо? Киһи быһыытынан сайаҕас майгыта, өйө-санаата дириҥэ, олох бары өрүттэрин ыараҥнатан көрөрө, бэлиитикэ, экэниэмикэ эйэгэтигэр элбэх сыратын биэрбитэ туоһулуур. 90-с сыллартан саҕалаан бу дьылга-күҥҥэ диэри кини кыттыыллаах төһөлөөх стратегическай суолталаах боппуруостар, хапытаалынай тутуулар ыытыллыбыттарын ааҕан сиппэккин, кыра киһи кыһалҕатын олус чугастык өйдүүр, тутатына быһаарсар идэлээх. Холобура, Москубаҕа магистратураҕа үөрэнэр сиэним истипиэндьийэтин быспыттарыгар төлөпүөнүнэн үҥсүбүппэр, кини туруорсан, үөрэх министиэристибэтэ истипиэндьийэ төлүөх буолла. Кырдьаҕас киһи онтон үөрэбин, махталбын тириэрдэбин. Ботуччу сууманы төлөтөллөр эбит.
Мин эрэ буолуо дуо? 20 сыл тухары сүүһүнэн дьон махталын ылбыт буолуохтаах. Көтөр билиэтэ суох, балыыһаҕа киирэргэ миэстэтэ суох, омук сиригэр эпэрээссийэлэнээччи, дьиэтэ суох тулаайахтар, өлбүт аймахтарын төрөөбүт түөлбэлэрин булларааччылар, үөрэнэ киирээччилэр, уопсай дьиэтэ суохтар о.д.а. кыһалҕалаахтар Александр Сергеевич сылаас сыһыанын, абыраллаах көмөтүн билбиттэрэ буолуо… Кини алта улуус Бочуоттаах гражданина, мин ити улуустарга барытыгар олорбута буолуо дии санаабаппын, үтүө дьыалаларын иһин дьоно-сэргэтэ махтанар буоллаҕа.
Хам-хаадьаа куоракка тиийдэхпинэ кабинетыгар киирэн тахсааччыбын, кабинетын аурата эйгэҕин сынньатар, уоскутар курдук гынааччы, эбэһээт дьонноох-сэргэлээх, эдэр дьокутааттар аксакалга сүбэлэтэллэрэ элбэх буолар. Мин көрдөхпүнэ, атын дьокутааттар ааннара лигиччи хатанан турар буолаллар. Александр Сергеевич сайын уоппускатыгар даҕаны үлэлии олорооччу. Сунтаардар Ил Түмэн дьокутааттарын куорпуһугар айылҕаттан араас эйгэҕэ уһулуччу талааннаах саха саарыннарын, бэрэсидьиэннэрин, боростуой дьонун үрдүк сыанабылын ылбыт Александр Сергеевич Уаров туһунан тус санааларым итинниктэр.

Парфений ИЛЛАРИОНОВ,
Сиэйэ.
(«Сунтаар сонуннара» хаһыат, №57 (9680), от ыйын 25 күнэ)