251

18 марта 2016 в 13:56

Александр Жирков: «Дьааҥыга Олоҥхо ыһыаҕа болдьоҕор ыытыллыаҕа»

Кэлиҥҥи кэмҥэ Ин­тер­неккэ, Ватсапка бы­йыл сайын Дьааҥыга былаан­наммыт Олоҥхо ыһыаҕа көспүтүн, букатын даҕаны ыытыллыбатын, өрөспүүбүлүкэ салалтата боппутун туһунан араа­һынай сурах-садьык тар­ҕанар. Ол иһин улуус нэһилиэктэрин баһылыктара дол­гуйбуттарын биллэрэн, Ил Түмэн Бэрэссэдээтэлин ааты­гар сурук ыыппыттар.

Бу боппуруоһу Саха Өрөспүүбүлүкэтин Госу­дарственнай Мунньаҕын (Ил Түмэн) Бэрэссэдээтэлэ, Олоҥхо иккис Уон сылын өрөспүүбүлүкэҕэ тэрийэн ыытар Национальнай комитет бэрэссэдээтэлэ Александр Жирков маннык диэн быһаарда:
— Ити тарҕаммыт сурах кырдьыкка олоҕурбат. Дьааҥы улууһугар былааннаммыт өрөспүүбүлүкэтээҕи Олоҥхо ыһыаҕа болдьоммут күннэригэр буолуоҕа. Ыһыаҕы Дьааҥыга ыытыы аҥаардас биир улуус эрэ баҕа санаата буолбатах, бу өрөспүүбүлүкэ салалтатын уустук уонна балачча толкуйдаан баран ылыммыт быһаарыыта. Бачча ыраах, суол-иис өттүнэн кыһалҕалаах уонна дьон-сэргэ бытанан олорор сиригэр үгүс ыалдьыттаах тэрээһини оҥорор судургу буолбатах. Ол үрдүнэн, улахан дьүүллэһии кэнниттэн, Олоҥхо национальнай комитета, “Олоҥхо” ассоциацията Дьааҥы улууһун дьаһалтатын, олохтоохторун хас да төгүллээх туруорсуутун учуоттаан, Уһук хоту саха дьоно уутуйан олорор сирин талбыта ылбычча буолбатах. Бу эппиэтинэстээх быһаарыы дьааҥыларга ытыктабыл, эрэнии уонна итэҕэйии быһыытынан сүктэрилиннэ. Онон Дьааҥы ыһыаҕын дьон-сэргэ өргө диэри саныы сылдьарын, үтүө өйдөбүллээх буоларын курдук хамсаныахтаахпыт. Баар ыарахаттары барыларын учуоттаан, быйылгы Олоҥхо ыһыаҕын хаһааҥҥытааҕар да үрдүк эппиэтинэстээхтик ыытар сорук турар, — диэн бэлиэтиир Александр Жирков.
Дьааҥы ытык сирэ былыр-былыргыттан олоҥ­хоҕо сүгүрүйэр, төрүт культураҕа, үгэстэргэ ураты харыстабыллаахтык сыһыаннаһар, ийэ олоҥхоһут Да­рия Томская-Чайка кур­дук уутуйан үөскээбит элбэх олоҥхоһуттаах, «Дьаа­ҥы фольклора дуо?» дэтэн, Иван Худяков курдук оччотооҕу чинчийээччилэр үлэлэригэр үйэтитиллибит ураты эйгэлээх түөлбэ буолар. Онон быйылгы Олоҥхо ыһыаҕын үрдүк таһымнаахтык ыытыыны тэрийээччилэр, улуус олохтоохторо өйдүүллэр уонна бу хамсааһыҥҥа бары кыһамньыларын уураллар.
Биллэрин курдук, Олоҥ­хо иккис Уон сылын өрөспүүбүлүкэҕэ тэрийэн ыытар Национальнай комитет бэрэссэдээтэлэ Александр Жирков уонна Олоҥхо ыһыаҕын тэрийэр кэмитиэт бэрэссэдээтэлэ Алексей Дьячковскай тохсунньу 29-олунньу 1 күннэригэр Дьааҥыга тиийэн, тэрийэр кэмитиэт мунньаҕын ыып­пыттара. Улууска бэлэмнэнии үлэтэ хайдах былааннаахтык ыытылларын, тутуу, транспорт, сибээс, биирдиилээн салааларынан, ыһыахха деле­гациялары көрсүү, олохтооһун, аһылыгынан хаач­чыйыы, культурнай программа боппуруостарын ырыппыттара, туох итэҕэстэр баалларын дьүүллэспиттэрэ, чопчу соруктары туруорбуттара. Верхоянскайга, Остуолбаҕа, Боронукка ыһыах ыалдьыттара түһүөхтээх, аһыахтаах объектарын көрбүттэрэ.
Өрөспүүбүлүкэ салалтата ыһыах кэмигэр Дьокуускайтан Дьааҥыга көтөр авиарейстэргэ дотация көрөр былааннаах. Маны сэргэ Александр Жирков Дьааҥы улууһун бары нэһилиэктэриттэн ыһыахха кыттыан баҕалаах дьон Верхоянскайга кэлиитин-барыытын хааччыйар, социальнай рейстэри көрөр туһунан боппуруоһу туруорбута.
Түмүктээн эттэххэ, быйылгы Олоҥхо ыһыаҕа кырдьаҕас Верхоянскай куоратыгар былааннаммытын курдук бэс ыйын 28-29 күннэригэр ыытыллыаҕа. Улуус олохтоохторо бары биир киһи курдук Олоҥхо ыһыаҕар бэлэмнэнэллэр, бэйэлэрин көҕүлээһиннэринэн Олоҥхо ыһыаҕын фондатын тэрийдилэр, биир күннээҕи хамнастарын аһардылар, акциялары ыыталлар. Күн-дьыл сылыйда да, ыһыах объектарын, Верхоянскайга Олоҥхо дьиэтин, Баатаҕайга элбэх хайысхалаах култуура киинин – Арчы дьиэтин тутуулара, тупсарыы үлэтэ саҕаланыахтара.