128

14 декабря 2018 в 09:39

Олоҕу киэргэтэр үтүө санаалаах фокусник

Амма олохтооҕо Михаил Афанасьев сэлээппэтиттэн куруолуктары, тарбаҕыттан харчыны  таһааран дьоҥҥо бэлэхтиир, дьоҥҥо үтүөнү аҕалартан үөрэр.

Биһиги аттыбытыгар араас дьикти дьарыктаах дьон баалларын, сороҕор саҥа билэн соһуйаҕын. Оннук киһинэн Аммаҕа олорор Афанасьев Михаил буолар. Кини дьикти дьарыктааҕын таһынан,  дьоҥҥо — оҕоҕо  олус амарах сүрэхтээх киһи.

Михаилы үгүстэр хорсун cанаалаах, илиитигэр кыахтаах  киһи — Амматааҕы баһаарынай сулууспа байыаһа диэн билэр буолуохтаахтар. Ол гынан баран, кини дьикти дьарыктааҕын — араас фокустары оҥорорун, дьону-сэргэни үөрдэрин, оҕолор эккирэтэ сылдьан сэргиир сэлээппэлээх фокусниктара буоларын билбэттэрэ буолуо!

Михаил Михайлович, ханна да үөрэм­мэккэ, бэйэтэ кыра эрдэҕиттэн интэриэһиргээн,  араас фокустары оҥорорго бэйэтэ үөрэммит. Аны артыыстыыр дьоҕура эмиэ оскуола саҕаттан баарын билигин киэҥ эйгэҕэ таһааран, дьону үөрдэр. Ордук киниэхэ фокус, жонглер, мимика, пантомима жанрдара табыллан, көрөөччүлэр ытыстара хабыллан олорор.  Холобура, фокускник сэлээппэтин иһиттэн тыыннаах куруолугу таһаарарын көрбүккүт дуо,тарбаҕын иһиттэн  тыһыынчалаах купюралар тахсан иһэллэрэ үчүгэйин,  кыһыл улахан таҥаһы көрдөрөн туран күөх өҥҥө кубулутара … итинник араас дьиктини оҥорор. Михаил аны биир ураты хаачыстыбата кини амарах сүрэҕэр, дьоҥҥо аһаҕас дууһалааҕар көстөр. Кинини кытта алтыспыт дьон: “Миисэни кытта сырыттахха ку­руук бэһиэлэй буолааччы, көрүдьүөстэр да элбэхтэр. Кини бэйэтэ итинник артыыс буолан төрөөбүт курдук, тоҕо артыыс үөрэҕэр киирбэтэҕэй? Үтүөнү баҕарар, амарах санаалаах киһи диэн дьэ кини?!” — диэн этээччилэр.

Олус да үчүгэй, маннык дьон баара. Билигин Михаил Михайлович биһиги сүпсүлгэннээх олохпутугар, сороҕор, сырдык санаа ситэри тиийбэт кэмигэр, үөрүү-көтүү кэмчитийбит сиригэр дьааһыгын туппутунан, сэлээппэтин кэппитинэн тиийэн, бэйэтин тула сырдыгы ыһар, дьоҥҥо үөрүүлээҕи бэлэхтиир. Оннук эрэ буоллун, махтал буоллун — Үтүө санаалаах фокусникка!!!

 

 

Алексей МАТВЕЕВ.