507

09 декабря 2016 в 12:11

Мин депутат буоллахпына… (өйтөн суруйуу)

Хас биирдии киһи бу орто туруу дойдуга ааһан иһэр айанньыт, хонон ааһар хоноһо буолар. Тоҕо итинник диибиний? Тоҕо диэтэххэ, хайдах суолу-ииһи хаалларара киһиттэн бэйэтиттэн тутулуктаах.

Сорох дьон кэнчээри ыччаттарыгар кэрэ кэпсээн буолан үйэлэргэ умнуллубат, атыттар сир үрдүттэн симэлийдилэр да ааттара умнууга хаалар… Киһи олоҕо араас суол курдук… Оттон хайдах дьон үтүө ааттара үйэлэргэ умнуллубата буолуой?! Мин санаабар, дьон эрэлин толорбут, дьоҥҥо-сэргэҕэ үтүө сыһыаннаах, майгылаах бастыҥнара буолуо! Билиҥҥи балысханнаах сайдыылаах үйэҕэ итинник үтүө дьону депутат гынар киһи! Төһөлөөх үйэлээҕи, үчүгэйи дьоҥҥо-сэргэҕэ оҥоруо этилэрэй!
Мин депутат буоллахпына, төрөөбүт дойдум, Сахам сирэ атын дойдулары кытта тэҥҥэ сайдарыгар олук ууруом этэ. Сахам сирэ барахсан айылҕалыын атын, тулалыыр эйгэлиин тупсаҕай. Ол кэрэни мин харыстыыр курдук дьаһал ылларыаҕым. Ол курдук, атын омуктар мээнэ, бэрээдэгэ суох кэлиилэрин бобуом этэ. Кэлии дьон эн айылҕаҕын аһыммат, маһы-оту алдьатар, суох оҥорор. Оттон ону өбүгэлэрбит үйэлэргэ харыстаан аҕалбыттара биһиэхэ, кэнчээри ыччаттарыгар!
Тулалыыр күөллэрбитин, суолбутун – барытын сахалыы ааттарынан суруйтарыам этэ.
Тоҕо кэлии омук саха тылын үөрэппэтий? Мин ону билиэхтээхтэр дии саныыбын! Депутат буоллахпына, ити боппуруостары бастакынан быһаарыам этэ.
Билигин аан дойдуга эҥин араас балаһыанньа: сэрии да буолар, уу да ылар, ойуур да умайар. Дьэ, оннук кэмҥэ сахам норуота хайдах суолун-ииһин булунар, ким-хайдах дьаһанар?! Кинилэри сирдиир, өйдөтөр дьонунан норуот депутаттара буолаллар. Депутат киһи инникини барытын ырыҥалаан көрөр буолуохтаах. Дьон-аймах кинини маныыр, батыһар. Атын туолбат, сатаммат сиринэн бардаҕына, дьэбэрэҕэ түһэригэр тиийэр…
Ол иһин мин депутат буолар күннээх буоллахпына, үчүгэйдик толкуйдаан баран үлэ үөһүгэр түһүөм этэ…

Анна Павлова,
Бордоҥ орто оскуолатын 7 кылааһын үөрэнээччитэ
Сунтаар улууһа, Сардаҥа сэлиэнньэтэ

 

«Мин депутат буоллахпына» диэн темаҕа өйтөн суруйууга куонкурус 2016 сыл ахсынньы 31 күнүгэр диэри салгыы ыытыллар.
Куонкурус түмүктэрэ «Ил Түмэн» хаһыат балаһаларыгар уонна news.iltumen.ru сайтка таһаарыллыахтара.
Куонкуруска кыттар үлэлэр iltumen@mail.ru электроннай почтаҕа эбэтэр почтанан маннык аадырыска ыытыллаллар: 677000, г.Якутск, ул.Орджоникидзе, 36/1, 205-206 офис, АУ ИД «Ил Тумэн».