8

12 октября 2018 в 11:08

Кэмитиэт бэрэссэдээтэлин солбуйааччыга хандьыдааттар туруорулуннулар

Алтынньы 10 к. Ил Түмэн Яков Ефимов салайааччылаах тутууга уонна ДьУоКХ сис кэмитиэтин бастакы мунньаҕа буолан ааста.

 

Мунньахха СӨ үпкэ миниистирин э.т. Валерий Жондоров, СӨ тутууга миниистирин бастакы солбуйааччы э.т. Павел Аргунов, СӨ экономикаҕа миниистирин бастакы солбуйааччы Владимир Сивцев, СӨ ДьУоКХ уонна энергетикаҕа миниистирин бастакы солбуйааччыта Наталья Сивцева уо.д.а. министиэристибэлэр, биэдэмистибэлэр, Ил Түмэн эппиэттээх үлэһиттэрэ кытыннылар.

Бастакы боппуруоһунан 2018 с. уонна 2019-2020 сс. былааннаммыт кэмҥэ Саха Өрөспүүбүлүкэтин судаарыстыбаннай бюджетын туһунан өрөспүүбүлүкэ сокуонугар уларытыылары киллэриигэ сокуон барыла бастакы ааҕыыга көрүлүннэ. Дакылааты үп миниистирин э.т. Валерий Жондоров оҥордо.

Норуот депутаттара Александр Слоик, Владимир Черноградскай, Феодосия Габышева, Дмитрий Семенов, Иван Данилов бэйэлэрин этиилэригэр тарифтары тэҥнээһиҥҥэ субсидиялары, хотугу оройуоннарга таас чоҕу тиэйиини үбүлээһини, нэһилиэнньэлээх пууннары гаастааһыны, “үтүө дьыала” чэрчитинэн объектары тутууну, бюджеты толорууну таарыйар боппуруостары бэлиэтээтилэр. Парламент туһааннаах кэмитиэтин өттүттэн хотугу оройуоннарга оттугу тиэйиигэ хонтуруолу кэмитиэт быһаарыытын барылыгар киллэрэр уонна 2018 сылга “үтүө дьыала” чэрчитинэн тутууга отчуоту кэмитиэккэ иһитиннэрэр туһунан норуот депутаттарын этиилэрэ өйөннүлэр.  Сис кэмитиэт сокуон барылын өйүүр туһунан быһаарыы ылла.

Иккис боппуруоһунан олорор дьиэ уонна олорор дьиэ-тутуу кооперативтарын  тэрийиини уонна кинилэр үлэлэрин сокуонунан сүрүннээһин туһунан РФ Сокуону оҥорооччуларын Сэбиэтин Президиумун сүбэлэрин олоххо киллэрии хаамыыта буолла. СӨ тутууга миниистирин бастакы солбуйааччы э.т. Павел Аргунов өрөспүүбүлүкэҕэ үлэлиир олорор дьиэ-тутуу кооперативтарын туһунан иһитиннэриитэ сибидиэнньэҕэ ылылынна. Көрүллэр боппуруоска 2018 сылга кэмитиэт “төгүрүк остуолу” ыытыахтааҕын туһунан пуун быһаарыыга киллэрилиннэ.

Итини таһынан сис кэмитиэт 2019 сылга хонтуруоллуур уонна экспердиир, ырытар тэрээһиннэри ыытар туһунан Ил Түмэн СӨ Ааҕар-суоттуур палаататыгар сорудаҕар этиилэри дьүүллэстэ. Ити дьүүллэһии кэннэ кэмитиэт икки бэрэбиэркэ туһунан этиилэрэ киирдилэр.

Маны сэргэ сис кэмитиэт үлэтин тэрээһин боппуруостара көрүлүннүлэр. Норуот депутата Сергей Никонов сис кэмитиэт чилиэнинэн талылларыгар этии оҥоһулунна.

Ити кэннэ Ил Түмэн тутууга уонна ДьУоКХ сис кэмитиэтин бэрэссэдээтэлин солбуйааччыны талыы туһунан боппуруос көрүүгэ турда. Баһыйар үгүс куолаһынан сис кэмитиэккэ бэрэссэдээтэли солбуйааччы 2 дуоһунаһа олохтонно, онно Александр Кошуков уонна Феодосия Габышева кандидатураларыгар этиилэр киирдилэр.

Челябинскай уобалас Сокуону оҥорор Мунньаҕа киллэрбит “Россия Федерациятын Сири-уоту тутуу кодексын 49 ыстатыйатыгар уларытыылары киллэрэр туһунан” (бырайыактарын докумуона судаарыстыбаннай экспертизаҕа бэриллэр объектар кэрискэлэрин кэҥэтии чааһыгар) 503123-7 №-дээх сокуонун барыла сис кэмитиэккэ өйөбүлү ылла.