26

12 октября 2018 в 10:53

Андрей Находкин бастакы мунньаҕы ыытта

Алтынньы 9 к. Ил Түмэҥҥэ Андрей Находкин салайааччылаах тыа сиригэр уонна аграрнай политикаҕа сис кэмитиэт бастакы мунньаҕа буолан ааста.

Кэмитиэт мунньаҕар СӨ үпкэ миниистирин э.т. Валерий Жондоров, экономика миниистирин э.т. Майя Данилова, Арктика дьыалаларыгар СӨ Судаарыстыбаннай кэмитиэтин бэрэссэдээтэлэ Прокопий Николаев, тыа хаһаайыстыбатын миниистирин бастакы солбуйааччыта Татьяна Осипова, СӨ Ааҕар-суоттуур палаататын аудитора Екатерина Федорова, СӨ Прокурорун старшай көмөлөһөөччүтэ Егор Неустроев,  уонна да атын министиэристибэлэр, департаменнар, Ил Түмэн эппиэттээх үлэһиттэрэ кыттыыны ыллылар.

Бастакы боппуруоһунан “2018 сылга уонна 2019 уонна 2020 сыллардааҕы былааннаммыт кэмҥэ Саха Өрөспүүбүлүкэтин судаарыстыбаннай бюджетын туһунан” Саха Өрөспүүбүлүкэтин Сокуонугар уларытыылары киллэрэр туһунан” СӨ сокуонун барыла көрүлүннэ (Саха Өрөспүүбүлүкэтин Баһылыгын сокуону көҕүлээһинэ, бастакы ааҕыы). Иһитиннэриини СӨ үпкэ миниистирин э.т. Валерий Жондоров оҥордо.

Норуот депутаттара Гаврил Алексеев, Пётр Аммосов, Иван Андреев, Владимир Черноградскай, Алексей Еремеев, Евгений Перфильев бэйэлэрин тыл этиилэригэр 2018 сылга үүт соҕотуопкатын үбүлээһини, судаарыстыбаннай бырагырааманы үбүлээһини хаалларыыны, тыа хаһаайыстыбатын бородууксуйатын кээмэйин улаатыннарыыны таарыйар боппуруостарга мунньах кыттыылаахтарын болҕомтотун тартылар.

Бу боппуруоһу көрөн баран, сис кэмитиэт СӨ Бырабыыталыстыбатыгар аадырыстаммыт пууну учуоттаан сокуон барылын өйүүргэ быһаарда. Итиннэ үүтү соҕотуопкалааһыҥҥа харчыны туһаайыыны хааччыйыы, тыа хаһаайыстыбатын сайдыытыгар судаарыстыбаннай бырагырааманы олоххо киллэриигэ бюджеттан ыытыллар үп сарбыллыыта таһаарыллыа суохтааҕын итиэннэ үүт соҕотуопкатын үбүлээһиҥҥэ 218 мөл. солк. кээмэйинэн үбү көрүү туһунан Ил Түмэн 2018 с. муус устар 25 к. 1508-V №-дээх уурааҕын 3-с пуунун толоруу туһунан этиллэр. Кэмитиэт үөһэ ыйыллар сокуон барылыгар түмүктээһинэ бигэргэннэ.

Иккиһинэн, кэмитиэт чилиэннэрэ тыа сиригэр уонна аграрнай политикаҕа сис кэмитиэт бэрэссэдээтэлин солбуйааччыны талыы туһунан боппуруоһу көрдүлэр. Сис кэмитиэт чилиэннэрин баһыйар үгүс куолаһынан бэрэссэдээтэли биир солбуйааччы солото олохтонно итиэннэ Ил Түмэн кэмитиэт бэрэссэдээтэлин солбуйааччынан норуот депутата Иван Слепцову таларыгар сүбэлэннэ.

Салгыы РФ Бырабыыталыстыбата киллэрбит “Тыа хаһаайыстыбатын сайдыытын туһунан” Федеральнай сокуон 10 ыстатыйатыгар уларытыыны киллэрэр туһунан” (судаарыстыбаннай бырагырааманы олоххо киллэрии хаамыытын уонна түмүктэрин туһунан национальнай дакылааты бэлэмнээһин уонна иһитиннэриигэ таһаарыы болдьоҕун уларытыы чааһыгар) 546348-7 №-дээх сокуон барыла көрүлүннэ. Бу барылы сис кэмитиэт биир санаана өйөөтө.

Ону сэргэ тыа сиригэр уонна аграрнай политикаҕа сис кэмитиэт үлэтигэр кэмитиэт чилиэннэрин этиилэрин көрүү туһунан быһаарыы ылылынна.