337

22 февраля 2017 в 11:12

Депутат үлэтин дьон-сэргэ сыаналыахтаах

Кэбээйи улууһун олохтоох депутаттарын Сэбиэтэ буолаары турар Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын I Съеһин сонун көрүүлэрдээх көрсөр. Улууска депутаттар үлэлэригэр сыана быһар рейтинг олоххо киирбит.

– Бэйэм көрүүбүнэн, ханнык баҕарар үлэ, ордук депутат үлэтэ-хамнаһа дьоҥҥо-сэргэҕэ көстөр түмүктээх буолуохтаах. Депутат үлэтин нэһилиэнньэ сыаналыырын инниттэн, бэйэбит улууспутугар тустаах рейтини былырыыҥҥыттан киллэрэн саҕалаатыбыт. Рейтинг түмүгэ бу сыл бүтүүтүгэр тахсыахтаах, – диэн Улуус сэбиэтин салайааччыта Александра Иванова саҥа сүүрээн туһунан кэпсиир.


– Кистэл буолбатах, сороҕор нэһилиэнньэ быыбардаан талбыт депутаттарын дьүһүнүн да көрбөт. Ити биһиги эрэ улууспутугар буолбакка, өрөспүүбүлүкэ үрдүнэн баар суол. Онон рейтини таһаарыыга депутат талыллыбыт уокуругун кытта ситимэ учуоттанар. Итиниэхэ норуот депутата дьону-сэргэни кытта төһө көрсөрө, үлэлэһэрэ ыйдаІаран тахсыахтаах. Ону тэҥэ, депутакка нэһилиэнньэттэн төһө накаас киирэрэ эмиэ сыаналанар.
Атын өттүнэн, депутат үлэтин сыаналыырга биир тутаах өрүтүнэн улуус дьаһалтатын кытта бииргэ үлэлиирэ буолар. Депутаттар улууска үлэлиир хамыыһыйаларга киирэн, тэҥҥэ үлэлэһэн, холобура, тыа хаһаайыстыбатыгар да, предпринимательствоҕа да туох бырагыраама баарын, ханнык үлэ-хамнас бара турарын нэһилиэнньэҕэ тиэрдэр кыахтаахтар.
«Депутаттар үлэлэрин өссө биир өрүтэ хонтуруолга сытар. Рейтини оҥорууга депутаттар тутуу үлэтин хонтуруоллуур уопсастыбаннай хамыыһыйаларга киирэн үлэлииллэрэ эмиэ учуоттанар», – диэн кэпсиир Александра Иванова. Итиниэхэ даҕатан эттэххэ, улууска хаарбах уонна саахалланар туруктаах дьиэттэн көһөрүү бырагырааматын чэрчитинэн күргүөмнээх тутуу үлэтэ бара турар. Онуоха нэһилиэк олохтоохторо, депутаттар тутуу үлэтин хаачыстыбатын көрө-истэ сылдьаллара улахан суолталаах.
«Общественноһы кытта үлэ туспа хайысханан турар. Билэргит курдук, өрөспүүбүлүкэ салалтата общественнай тэрилтэлэри кытта үлэҕэ ураты болҕомтону уурар. Соторутааҕыта тустаах министерство тэриллэн, социальнай хайысхалаах үлэни ыытар холбоһуктарга судаарыстыба өттүттэн үбүнэн да, сүбэнэн-аманан да көмө, өйөбүл күүһүрдэ», — диэн санаатын үллэстэр Улуус сэбиэтин салайааччыта.
Кэбээйилэр өссө биир туруорсуулара – депутаттарга анаммыт үөрэхтээһини тэрийии. «Баһылык тута баһылык буолбат, депутат ылла да депутат буолан хаалбат. Депутат буоларга кимтэн эрэ үөрэниэххэ, элбэҕи билиэххэ-көрүөххэ, сокуон ымпыгын-чымпыгын быһаарсыахха наада”. Ити этиини бэрэстэбиитэллээх уорганнар Ассоциациялара өйөөн, быйыл Сангаарга депутаттарга тустаах семинар ыытыллыаҕа.