59

24 сентября 2018 в 10:38

Пенсияҕа тахсыыга чэпчэтии кимиэхэ уларыйбатый?

Госдума регион политикатыгар кэмитиэтин чилиэннэрэ пенсия систематын рефор­малааһын туһунан сокуон барылын иккис ааҕыы иннинэ бэлэмнэниллэр уларытыылары дьүүллэһиэхтэрэ.

Иһитиннэриллибитин курдук, сокуон барылыгар пенсияҕа тахсыы сааһын үрдэтии суотугар кырдьаҕаһынан пенсияҕа тахсыбыттарга төлөбүрдэр сыыйа-баайа улааталлара көрүллэр. Миниистирдэр кабинеттара суоттуурунан, пенсияҕа тахсар сааһы көннөрөн биэрииттэн номнуо кэлэр сылга билиҥҥи пенсиялаах дьоҥҥо төлөбүрдэр инфляцияны икки төгүл аһарар таһымынан индексацияланаллара күүтүллэр. Сокуон барыла ылыллар түгэнигэр 2024 сылга диэри пенсия кээмэйэ айах ииттэн олоруу алын кээмэйин 2 төгүлүнэн улаатыаҕа уонна ортотунан 20 тыһ. солк. тэҥнэһиэҕэ. Пенсия систематыгар уларытыыларга көһүү кэмэ уһун болдьохтоох – эр дьоҥҥо 2028 сылга  итиэннэ дьахталларга 2034 сылга диэри. Ити кэм түмүктэннэҕинэ, дьахталлар пенсияҕа 63 саастарыгар тахсыахтара, оттон эр дьон – 65-гэр.

Россия сорох олохтоохторун ити ыйыллыбыт уларыйыылар таарыйыахтара суоҕа. Чуолаан, бу 5 уонна онтон элбэх оҕону ииппит ийэлэр, радиация тарҕаныытын кытта сибээстээх саахалларга эмсэҕэлээбит гражданнар, буортулаах уонна кутталлаах усулуобуйаҕа үлэлиир дьон.

Билигин көрүллэр көннөрүүлэр ортолоругар элбэх үлэ ыстаастаах гражданнарга: 42 сыл ыстаастаах эр дьоҥҥо уонна 37 сыл ыстаастаах дьахталларга болдьоҕун иннинэ страховой пенсияҕа тахсыыны (пенсияҕа тахсар саастан икки сыл иннинэ) олохтуур туһунан этии баар. Итини таһынан, Госдумаҕа киллэриллибит көннөрүүлэринэн пенсияҕа тахсыан иннинээҕи үлэһиттэргэ сыллата диспансеризацияны ыытыы итиэннэ Хоту дойду төрүт уонна аҕыйах ахсааннаах норуоттарыгар пенсияҕа тахсыыга билигин үлэлиир усулуобуйалары уларыппакка хаалларыы көрүллэр.

Көрүллүөхтээх уларытыылар ортолоругар дьахталлар пенсияҕа тахсар саастарын 63-тэн 60-ҥа диэри намтатыы уонна үлэҕэ ылыыттан олоҕо суох аккаастааһын эбэтэр пенсияҕа тахсыан иннинээҕи саастаах дьону үлэттэн ууратыы иһин холуобунай эппиэтинэһи киллэрии туһунан Владимир Путин этиилэрэ бааллар. Госдума дааннайдарын базатыгар киллэриллибит сокуон барылын быһыытынан, ити иһин 200 тыһ. солк. диэри ыстараап эбэтэр 360 чааска диэри болдьоххо булгуччулаах үлэлэр суоһуохтара.