63

14 сентября 2018 в 09:45

Сөмөлүөккэ табахтаамаҥ!

Сөмөлүөккэ пилот уонна стюардессалар ирдэбиллэрин толорбот, табахтыыр уонна “турбулентнай зонаҕа” көтүү кэмигэр салоҥҥа хаама сылдьар пассажирдар 20-тэн 40 тыһыынча солкуобайга диэри ыстараап төлүөхтэрэ. Туһааннаах сокуон барылын Госдума бастакы ааҕыыга ылынна.

Салгын аалыгар кэккэ бөрүкүтэ суох дьайыылар иһин ыстарааптар улаатыахтара

 

Сөмөлүөккэ суумнааччылартан ороскуот  элбэх

 

Саҥа нуормалары оҥоруу сөмөлүөккэ уопсастыбаннай бэрээдэги кэһии түбэлтэлэрэ элбээбитин кытта сибээстээх. Сорох пассажирдар сөмөлүөккэ киириэхтэрин иннинэ номнуо “аһаабыт” буолааччылар, онон кинилэри рейскэ чугаһаппаттар, оттон атыттар көтүү кэмигэр “бэһиэлэй” буолаллар. 2017 сылга 342 киһини көтүүгэ көҥүллээбэтэхтэр, оттон рейстэн 292 гражданины уһулбуттар. Кинилэр бортпроводниктар уонна салгын аалын хамандыырын ирдэбиллэрин толорботохтор.

РФ юстицияҕа миниистирин солбуйааччы Юрий Любимов этэринэн, сокуон барыла Президент сорудаҕын толоруу быһыытынан бэлэмнэммит. Ити докумуонунан сөмөлүөккэ суумнааччылары административнай эппиэтинэскэ тардыыны күүһүрдэргэ этиллэр. Онон сокуон барыла ылылыннаҕына, пилот бирикээһин толорботоххо, сөмөлүккэ табахтаатахха уонна куру баанартан аккаастаннахха, пассажирдар 20-40 тыһыынча солк. ыстараабы төлүөхтэрэ. Оттон гражданин сөмөлүөккэ хаартыскаҕа түһэрии, видеоҕа устуу быраабылаларын кэспит эбэтэр мобильнай төлөпүөнү туһаммыт түгэнигэр ыстараап 100-тэн 1000 солк. диэри буолуоҕа. Билигин Россия дьонун үгүстэрэ сөмөлүөккэ олороот да төлөпүөннэрин холбообутунан бараллар, оттон сокуону ылыныы кэннэ кинилэр ити кэһии иһин төлүөхтэрэ, ол эбэтэр сөмөлүөт толору тохтуор диэри мобильнайы холбуур бобуллар.

«Сокуон барылын ылыныы сөмөлүөт иһигэр бэрээдэги кэһии иһин туһааннаах накаастабылы олохтуур кыаҕы биэриэҕэ», — диэн бэлиэтээтэ Юрий Любимов. Кини этэринэн, холуочук пассажирдартан сылтаан ордук тиэйээччи ночоотурар. Айдааны тардааччы атын пассажирдарга уонна бортпроводниктарга мэһэйдиир итиэннэ маннык дьайыылара сөмөлүөккэ хоромньуну таһаарыахтарын, салгын аала салгыы айанныырыгар графига кэһиллиэн сөп, ол курдук, сөмөлүөтү сиргэ олордорго күһэллэллэр.

Госдума судаарыстыбаннай тутууга уонна сокуону оҥорууга Кэмитиэтин бэрэссэдээтэлин бастакы солбуйааччыта Вячеслав Лысаков сокуон барылын быһаарарыгар, ити докумуон сөмөлүөккэ суумнааччыларга сыһыаннаан сиэрдээх накаастабылы олохтуурун бэлиэтээтэ.

«Күлүгээннэргэ билигин кэппиэйкэнэн ыстараап түһэриллэр,  оттон кинилэр дьайыылара араас содуллаах буолуон сөп, — диэтэ кини. – Ол курдук, кинилэргэ накаастабыл чуолкай системата суох. Тырааныспары куттала суох үлэлэтиигэ суоһуур дьайыылары күлүгээннии санааттан оҥоруу иһин 5 сылга диэри көҥүлү быһар холуобунай накаастабыл эрэ олохтонон турар. Ол эрээри бытархай күлүгээттэри ХК ити ыстатыйатыгар түбэһиннэрэр сатаммат».

 

Пилоттар арыгы иһэллэрэ бэлиэтэммит

 

Бырабыыталыстыба штурвалы итирик туруктаах туппут пилоттарга административнай эппиэтинэһи олохтуурга этии оҥордо. Кинилэргэ ыстараап 50 тыһ. солк. диэри буолуон сөп. Маныаха билигин баар накаастабыл оннунан хаалар — 2-3 сылга сөмөлүөтү ыытар бырааптара быһыллар. Пилоттар сулууспалаах эбээһинэстэрин толорор кэмнэригэр итириктээһин түбэлтэлэрэ баар чахчытыттан депутаттар соһуйдулар. «Биһиэхэ ардыгар пассажирдар, ордук ити “сулустарга” сыһыаннаах, итирик туруктаахтарын итиэннэ атын дьон настарыанньатын буортулуулларын көрдөрөллөр, — диэтэ Госдума судаарыстыбаннай тутууга кэмитиэтин чилиэнэ Сергей Иванов (РЛДП). — Ол эрээри пилоттар холуочук туруктаах көппүт түгэннэрин өйдөөбөппүн. Итинник түбэлтэ биһиэхэ элбэх дуо?» Юрий Любимов маннык чахчылар баалларын, ол эрээри чопчу статистика суоҕун бигэргэттэ.

Госдума хонтуруолга уонна Регламеҥҥа кэмитиэтин чилиэнэ единоросс Андрей Альшевских ааҕарынан, пилоттарга накаастабылы күүһүрдэр наадалаах. «Итирик туруктаах салгын аалын ыытыы ханнык содуллардаах буолуоҕун биһиги бэркэ диэн өйдүүбүт», — диэтэ кини.

 

Сөмөлүөккэ уопсастыбаннай бэрээдэги  кэһии  иһин  бүгүн  үлэлиир  ыстарааптар

 

  • Бортка табахтааһын  иһин — 1000 солк.
  • Куру баамматахха — 2-5 тыһ. солк.
  • Салгын аалын хамандыырын ирдэбиллэрин толорботоххо — 2-5 тыһ. солк.
  • Маатыралааһын, полицияҕа бэриммэт буолуу — 2,5 тыһ. солк. диэри
  • Сөмөлүөтү ыытар бырааба суох киһи салайыыта — 2-2,5 тыһ. солк.
  • Итирик туруктаах сөмөлүөтү салайыы — 2-тэн 3 сылга диэри сөмөлүөтү ыытар быраабы бы­һыы