191

11 ноября 2016 10:19

Өссө төгүл пенсия туһунан

Госдума үлэҕэ, социальнай политикаҕа уонна бэтэрээннэр дьыалаларыгар кэмитиэтэ бары пенсиялаахтарга пенсияны индексациялааһын урукку бэрээдэгэр төннөргө этиилээх. Кинилэр бу этиилэрэ «2017 сылга уонна 2018-2019 сс. былааннаммыт кэмҥэ Россия Федерациятын Пенсионнай фондатын бюджетын туһунан» сокуон барылыгар кэмитиэт официальнай түмүктээһинигэр киирдэ. Ити туһунан Госдума официальнай сайтыгар иһитиннэрии баар.

Бырабыыталыстыба киллэрбит итиэннэ билигин бастакы ааҕыыга бэлэмнэниллэр барылыгар сөп түбэһиннэрэн, кэлэр сыл олунньу 1 күнүттэн гражданнар сорох категорияларыгар страховой пенсия олохтоммут төлөбүрүн итиэннэ ыйдааҕы харчынан төлөбүрдэри 5,8% индексациялааһын былааннанар.
Социальнай пенсиялар муус устар 1 күнүттэн 2,6% индексацияланыахтара, ол улаатыы бу иннинээҕи сылга пенсиялаах киһи айах ииттинэр алын кээмэйэ үүнүүтүн билгэлээһиҥҥэ сөп түбэһэр.
Итини таһынан, олунньу 1 күнүттэн пенсия коэффициенын сыаната 5,8% — 78 солк. 58 х. диэри улаатара көрүллүбүт.
2017 сылга страховой пенсия орто кээмэйэ 526 солк. улаатан 13 тыһ. 208 солк. тэҥнэһиэҕэ. Социальнай пенсия 224 солк. улаатан 8 тыһ. 854 солк. тиийиэҕэ.
Кэмитиэт түмүктээһинигэр бэлиэтэммитинэн, индексация үлэлээбэт пенсиялаахтарга эрэ көрүллэр. Билиҥҥи социальнай-экономическай балаһыанньаҕа депутаттар урукку бэрээдэккэ төннөр тоҕоостооҕун этэллэр, ол эбэтэр үлэ­лээбэт да, үлэлиир да пенсионердарга индексациялааһын бэрээдэгэр.
Сокуон барылын быһыытынан, 2017 сылга Пенсионнай фонда дохуоттара 8,4 трлн солк. буолуохтара, ороскуоттара — 8,6 трлн солк., дефицитэ — 220 млрд солк.
Фонда бюджета пенсияны ылааччылар ахсааннара 604 тыһ. киһинэн улаатара билгэлэнэрин учуоттаан оҥоһулунна. 2017 сыл саҕаланыытыгар Россияҕа пенсиялаах дьон ахсаана 43 мөл. киһини аһарыаҕа.
Бюджеттар икки ардыларынааҕы трансферт көрүҥүнэн ыытыллар федеральнай бюджет үбэ Фонда дохуоттаах чааһыгар 46% ылыаҕа.