85

12 октября 2018 в 11:23

Тыа хаһаайыстыбатын үлэһиттэрин күнүнэн!

Ытыктабыллаах тыа хаһаайыстыбатын үлэһиттэрэ, бэтэрээннэрэ!

Саха Өрөспүүбүлүкэтин Судаарыстыбаннай Мунньаҕын (Ил Түмэн) тыа сиригэр уонна аграрнай бэлиитикэҕэ сис кэмитиэтин аатыттан эһигини Тыа хаһаайыстыбатын үлэһиттэрин күнүнэн итиитик-истиҥник эҕэрдэлиибин!
Өрөспүүбүлүкэҕэ тыа хаһаайыстыбата олохтоох норуот сүрүн дьарыга, кэскилэ уонна инники күөҥҥэ турар биир сүрүн салаата буолар. Ол курдук, анал программалар чэрчилэринэн сүөһү ахсаанын элбэтиигэ, кэтэх, бааһынай хаһаайыстыбалар укулааттарын бөҕөргөтүүгэ туһуламмыт араас хайысхалаах үлэ-хамнас биһиги Ил Дархаммыт, Ил Түмэммит, Бырабыыталыстыбабыт өттүттэн сөптөөхтүк ыытыллар.
Бүгүн тыа хаһаайыстыбатын астыыр уонна батарар тиһигин кэҥэтии уонна бөҕөргөтүү нөҥүө, табаары оҥорон таһаарыыны улаатыннарыы тыа хаһаайыстыбатын сайдыытын тирээн турар соруга буолар.
Өрөспүүбүлүкэ агропромышленнай комплекса былааннаахтык сайдарыгар тыа хаһаайыстыбатынан дьарыктанар хас биирдии улуус, хаһаайыстыба киллэрэр кылаата тугунан да кэмнэммэт.
Бу күн идэлэригэр бэриниилээх, салаа сайдыытыгар олохторун анаабыт, эдэр ыччакка холобур буолар, өр сылларга бу эйгэҕэ үлэлээбит дьоммутугар истиҥ эҕэрдэбитин этэбит. Эһиги сыралаах үлэҕитин үрдүктүк сыаналыыбыт!
Тыа хаһаайыстыбатын бары үлэһиттэригэр уонна бэтэрээннэригэр баҕарабын ыраас халлааны, быйаҥнаах бааһынаны, үрдүк үүнүүнү, дьоһун дохуоту, чэгиэн-чэбдик доруобуйаны, тус бэйэҕитигэр уонна чугас дьоҥҥутугар ситиһиини, уйгулаах олоҕу, дьолу-соргуну!

Андрей Михайлович Находкин,
Саха Өрөспүүбүлүкэтин Судаарыстыбаннай Мунньаҕын (Ил Түмэн) тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ.
Дьокуускай куорат, 2018 сыл, алтынньы ый