35

12 октября 2018 в 11:20

Кэнэҕэски паарка миэстэтигэр сүөһү көмүүтэ суох

СӨ кэнэҕэски көлүөнэлэргэ тус сыал­лаах фондата Дьокуускай куорат 79-с кыбартаалыгар Сибиир язвата ыарыылаах сүөһүлэр өлүктэрин көмүү баарын-суоҕун чинчийиини түмүктээтэ. Роспотребнадзор Иркутскайдааҕы НЧИ ити учаастагы Сибиир язвата ыарыылаах сүөһүлэр көмүллүбүт сирдэрин испииһэгиттэн таһаарарга этии оҥордо.

Санатар буоллахха, СӨ кэнэҕэски көлүө­нэлэргэ тус сыаллаах фондатын этиитинэн, Дьокуускайга ыччат уонна оҕо дьарыгын тэрийиигэ анаан элбэх соругу толорор уопсастыбаннай эйгэни – Кэлэр көлүөнэлэр пааркаларын оҥорор туһунан быһаарыы ылыллыбыта. Онуоха анаан Дьокуускай куорат 79-с кыбартаалыгар, устудьуоннар куораттарыттан чугас кураанах турар сири-уоту талбыттара.
Ол эрээри ити кыбартаалга уруккута Сибиир язвата ыарыылаах сүөһүлэр өлүктэрин көмүү баарын туһунан иһитиннэриини кытта сибээстээн, пааркаҕа сылдьааччылар олохторугар, доруобуйаларыгар куттал суоһуон сөбүн туһунан сэрэхэдийиилэр үөскээбиттэрэ. Онон идэтийбит тэрилтэни тардан, кыбартаал сиригэр-уотугар научнай чинчийиилэри ыытарга быһаарыллыбыта. Бу үлэни Роспотребнадзор Иркутскайдааҕы научнай-чинчийэр института толорбута.
Институт кыбартаал сирин-уотун барытын хабан, сиһилии чинчийиини ыытта. Араас дириҥтэн ылыллыбыт буор 450-ча боруобатыгар микробиологическай анализ оҥоһулунна.
79-с кыбартаал сиригэр-уотугар баар учаастакка Сибиир язватыттан охтубут сүөһүлэр өлүктэрин көмүү суох, онон биологическай куттала суох диэн институкка түмүктээбиттэр. Бу объегы учуоттан уһуларга уонна Сибиир язвата ыарыылаах сүөһү көмүллүбүт сирдэрин испииһэгиттэн таһаарарга этиллибит.
Ол үрдүнэн, уруккута ветеринарнай лаборатория үлэтин бигэргэтэр архыып матырыйаалларыгар олоҕуран, ону сэргэ Дьокуускай куорат айылҕатын-климатын уонна гидрогеологическай усулуобуйаларын учуоттаан, “Сибиир язватын учаастагын” чэрчитинэн буору хаһыыны кытта сибээстээх үлэни ыыппаттарыгар сүбэлэннэ.
Кэнэҕэски көлүөнэлэргэ аналлаах фондаҕа иһитиннэрбиттэринэн, Иркутскайдааҕы институт сири-уоту бетонунан бүрүйэргэ уонна ол кэннэ тутууну ыытарга сүбэлээтэ.

СИА.