12

02 ноября 2018 в 14:59

Судаарыстыбаннай  бюджет туһунан сокуон барылыгар аһаҕас истии

Ил Түмэн спикерэ Петр Гоголев алтынньы 25 күнүнээҕи 107 №-дээх дьаһалынан «Саха Өрөспүүбүлүкэтин 2019 сылга уонна кэлэр 2020-2021 сс. судаарыстыбаннай бюджетын туһунан» Саха Өрөспүүбүлүкэтин сокуонун барылын туһунан» тиэмэҕэ аһаҕас истии ыытыллыаҕа.

Аһаҕас истии Ил Түмэн бюджекка, үпкэ, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэтин киэҥ ыҥырыылаах мунньаҕын быһыытынан барыаҕа.
Сүрүн иһитиннэриини СӨ экономикатын миниистирэ Майя Данилова  уонна СӨ үбүн миниистирэ Валерий Жондоров оҥоруохтара.
Тэрээһиҥҥэ парламент салалтата, норуот дьокутааттара, бырабыыталыстыба чилиэннэрэ, министиэристибэлэр, биэдэмистибэлэр, улуустар, куораттааҕы уокуруктар бэрэстэбиитэллэрэ, уопсастыбаннас, суруналыыстар кыттыахтара.
Маннык истиини Ил Түмэн бюджекка, үпкэ, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэтэ бэрэссэдээтэл Юрий Николаев салалтатынан өрөспүүбүлүкэ үпкэ сүрүн докумуона хайдах буолуохтааҕын Саха сирин нэһилиэнньэтигэр иһитиннэрэр, тиэрдэр, ис хоһоонунун билиһиннэрэр соруктаах тэрийэр.
Бюджет туһунан истии сэтинньи 8 күнүгэр парламент 330 №-дээх мунньахтыыр саалатыгар 10 ч. ыытыллар.

Ил Түмэн пресс-сулууспата.