Просмотров - 9

31 июля 2017 11:08

Алмазбек Атамбаев резиденциятыгар көрсүһүү

СӨ парламенын пресс-сулууспата иһитиннэрбитинэн, от ыйын 22 күнүгэр Чолпон-Ата куоракка СӨ Ил Түмэнин Бэрэссэдээтэлэ, “Аан дойду норуоттарын эпостара” Норуоттар икки ардыларынааҕы ассоциация вице-президенэ Александр Жирков Кыргызстан Өрөспүүбүлүкэтин Президенэ Алмазбек Атамбаевы кытта көрүстэ.

“Алтай цивилизацията уонна алтай тылларын бөлөҕөр киирсэр уруулуу норуоттар” норуоттар икки ардыларынааҕы Форум чэрчитинэн бу көрсүһүү Кыргызстан Өрөспүүбүлүкэтин Баһылыгын Судаарыстыбаннай резиденциятыгар буолан ааста.
Алмазбек Атамбаев бочуоттаах ыалдьыты истиҥник эҕэрдэлээтэ, көрсүһүүттэн үөрэрин бэлиэтээтэ. Кыргызстан Баһылыга Алтай цивилизациятын Форумугар кыттыытын иһин Александр Жирковка махталын биллэрдэ.
Кэпсэтии кэмигэр Кыргыз­стан уонна Саха Өрөспүү­бүлүкэтин икки ардыларыгар култуурунай-гуманитарнай бииргэ үлэлээһин боппуруостара дьүүллэһилиннилэр, итиэннэ икки өрүттээх сибээстэри салгыы бөҕөргөтүүгэ бииргэ үлэлээһини салгыыр суолталааҕа бэлиэтэннэ.


Санаттахха, 2015 с. муус устарыгар Кыргызстаҥҥа «М.К. Аммосов. Кыргызский период деятельности» диэн кинигэни билиһиннэрии ыытыллыбыта. Бу кинигэни таһаарыыны көҕүлээччинэн Алмазбек Атамбаев буолбута. Судаарыстыба баһылыга итиннэ сыһыаннаах этиитин 2014 с. сэтинньитигэр, икки норуот эпостарын тылбаастааһыҥҥа бырайыак ситиһиилээхтик түмүктэммит бэлиэтигэр ыытыллыбыт көрсүһүү кэмигэр иһитиннэрбитэ. Ол кэмҥэ өрүттэр М.К.Аммосов Кыргызстаҥҥа ааспыт олоҕун туһунан кинигэни таһаарыы туһунан дьүүллэспиттэрэ. Номнуо биир сыл иһигэр ити идея олоххо киирбитэ.
Ол бэлиэ түгэн чиэһигэр Алмазбек Атамбаев Саха сирин парламенын Бэрэссэдээтэлэ Александр Жирков баһылыктаах делегацияны кытта көрсүбүтэ. Кыргызстан Өрөспүүбүлүкэтин Баһылыга кыргыз “Манас” эпоһын, улуу суруйааччы Чингиз Айтматов уонна да атын кыргыз ааптардарын айымньыларын сырдатыы дьыалатыгар ыйааһыннаах кылаатын итиэннэ судаарыстыбаннай деятель Максим Кирович Аммосов аатын үйэтитии иһин Ил Түмэн спикеригэр махталын тиэрдибитэ.
Аан дойду 11 дойдутуттан учуонайдар кыттыылаах “Алтай цивилизацията уонна алтай тылларын бөлөҕөр киирсэр уруулуу норуоттар” Норуоттар икки ардыларынааҕы форум от ыйын 20-22 күннэригэр үрдүк хайалаах сиргэ баар Иссык-Куль кытылыгар буолан ааста.
Форум кыттыылаахтара Алтай регионуттан тахсыбыт норуоттар култуура, тыл, история өттүнэн сибээстэрин үөрэтэр соруктаахтар. Учуонайдар санааларынан, Алтай киһи аймах цивилизациятын биһиктэриттэн биирдэстэринэн, финно-угорскай, түүр-монгол, маньчжур-тунгус, кэриэй уонна дьоппуон норуоттарын төрүт сирдэринэн буолар. Алтай тылларын бөлөҕөр киирсэр норуоттар бүгүн Саха сириттэн саҕалаан Турцияҕа уонна Ираҥҥа, ону сэргэ Венгрияҕа, Карелияҕа, Уралга, Поволжьеҕа итиэннэ Киин Азияҕа тарҕанан олороллор.
Форум үлэтин түмүгүнэн декларация ылылынна, онно бэлиэтэнэринэн, уопсай Алтайтан силистээх-мутуктаах норуоттар уонна дойдулар икки ардыларыгар наука-үөрэх уонна култуура сибээстэрин саҥа көрүҥэ хардарыта өйдөһүү дириҥииригэр уонна бииргэ үлэлээһин кэҥииригэр тирэх буолуоҕа.

Султан Досалиев хаартыскаҕа түһэриитэ.